'పర్యాటక రంగాన్ని తక్షణమే పునరుద్ధరించాలి'

పర్యాటక, ఆతిథ్య రంగాలను తక్షణమే పునరుద్ధరించాలని కేంద్రాన్ని కోరింది భారత పర్యాటక, ఆతిథ్య రంగాల పరిశ్రమల సమాఖ్య. ఈ మేరకు అత్యవసరంగా చర్యలు చేపట్టాలని, దిల్లీలోని హోటల్​లను తిరిగి తెరిచేందుకు అనుమతివ్వాలని విజ్ఞప్తి చేసింది.

కరోనా సంక్షోభం కారణంగా తీవ్రంగా ప్రభావితమైన పర్యాటక, ఆతిథ్య రంగాలను పునరుద్ధరించించేందుకు అత్యవసరంగా చర్యలు చేపట్టాలని భారత పర్యాటక, ఆతిథ్య రంగాల పరిశ్రమల సమాఖ్య (ఫెయిత్‌) కేంద్ర ప్రభుత్వాన్ని కోరింది. పర్యాటక శాఖతో సమావేశం అనంతరం ఈ మేరకు తెలిపింది. పర్యాటక రంగాన్ని తిరిగి ప్రారంభించడానికి డిమాండ్​ ఉత్పత్తి, సరఫరా రక్షణ చర్యలు తక్షణమే అమలు అవుతాయని ఆశాభావం వ్యక్తం చేసింది.

పర్యాటక రంగ పునరుద్ధరణకు ద్వంద టాస్క్​ ఫోర్స్ వ్యూహాన్ని అమలు చేయాలని ప్రతిపాదించింది ఫెయిత్. కేంద్ర స్థాయిలో ఓ టాస్క్​ ఫోర్స్, రాష్ట్ర స్థాయిలో మరో టాస్క్ ఫోర్స్​ను ఏర్పాటు చేయాలని సూచించింది.

అంతర్జాతీయ పర్యాటక ఆపరేటర్లలో విశ్వాసం నింపడానికి 'ఇండియన్ టూరిజం మార్ట్​' ప్రదర్శనను నవంబరు మొదటి వారం లేదా నాలుగో వారాల్లో నిర్వహించాలని పర్యాటక శాఖను కోరింది ఫెయిత్​. దిల్లీలోని హోటల్​లను తిరిగి తెరిచేందుకు అనుమతివ్వాలని విజ్ఞప్తి చేసింది.