ఇటీవలే రికార్డు స్థాయిలో పతనమైన ముడి చమురు ధరలు.. నేడు అంతే వేగంగా పుంజుకున్నాయి. ప్రస్తుత డిమాండుకు తగ్గట్లు చమురు ఉత్పత్తిని తగ్గించి.. మద్దతు ధర కల్పించేందుకు సౌదీ అరేబియా, రష్యాలు చర్చలు జరుపుతాయని అమెరికా అధ్యక్షుడు డొనాల్డ్ ట్రంప్ ట్వీట్ చేశారు. ఈ ఒక్క ట్వీట్తో అంతర్జాతీయ మార్కెట్లో ముడి చమురు ధరలు భారీగా పెరిగాయి.
నార్త్ సీలో బ్యారెల్ ముడిచమురు ధర 30శాతం వృద్ధితో 36.29 డాలర్లకు చేరింది. డబ్ల్యూటీఐ కూడా 25.4శాతం మెరుగుపడి 27.39 డాలర్లకు పెరిగింది.
పెరిగింది కానీ...
ట్రంప్ ట్వీట్పై రష్యా అధ్యక్షుడు వ్లాదిమిర్ పుతిన్ అధికార ప్రతినిధి మాత్రం.. సౌదీ యువరాజుతో ఎలాంటి సంభాషణలు జరగలేదని స్పష్టం చేశారు. అయితే దీని ప్రభావం చమురు ధరలపై పడే అవకాశముంది.
అనూహ్య నిర్ణయం..
ప్రపంచంలోనే అతిపెద్ద చమురు ఉత్పత్తి దేశమైన సౌదీ అరేబియా అనూహ్య నిర్ణయం తీసుకుంది. ఒపెక్ దేశాలు సహా చమురు ఉత్పత్తి దేశాలన్నింటితోనూ అత్యవసర సమావేశానికి పిలుపునిచ్చింది. చమురు ధరల స్థిరీకరణ కోసం ఈ సమావేశం ఏర్పాటు చేస్తున్నట్లు తెలిపింది.
సౌదీ యువరాజు మహమ్మద్బిన్ సల్మాన్, ట్రంప్ల మధ్య ఫోన్ సంభాషణ జరిగిన కొద్ది సేపటికే.. సౌదీ ఈ అనూహ్య నిర్ణయం తీసుకోవడం గమనార్హం.
అయితే.. ఒపెక్ సహా 22 దేశాలతో ఇది వరకే సౌదీ చర్చలు జరిపినా ఎలాంటి ఒప్పందం మాత్రం కుదరలేదు. ఇందుకు రష్యా అవలంభించిన తీరే ప్రధాన కారణమని సౌదీ ఆరోపించింది.
18 ఏళ్ల కనిష్ఠం..
సౌదీ, రష్యాల మధ్య నెలకొన్న విభేదాల కారణంగా చమురు ధరలు ఇటీవలే 18 ఏళ్ల కనిష్ఠానికి పడిపోయాయి.
ఇదీ చూడండి:ఏప్రిల్ 15 తర్వాత అంతర్జాతీయ విమానాలకు అనుమతి!
