హరియాణా గురుగ్రామ్లో ఘోర రోడ్డు ప్రమాదం జరిగింది. కారు, ట్రక్కు ఢీకొన్న ఘటనలో నలుగురు దుర్మరణం చెందారు. మరో ఇద్దరు తీవ్ర గాయాల పాలయ్యారు. ఈ ప్రమాదం దిల్లీ-జైపుర్ జాతీయ రహదారిపై సోమవారం రాత్రి జరిగింది. సమాచారం అందుకున్న పోలీసులు ఘటనా స్థలానికి చేరుకుని.. సహాయక చర్యలు చేపట్టారు. క్షతగాత్రులను ఆస్పత్రికి తరలించారు. మృతదేహాలను శవపరీక్ష నిమిత్తం తరలించారు. మృతులంతా దిల్లీకి చెందిన వారిగా గుర్తించామని పోలీసుల తెలిపారు. ప్రమాదంపై కేసు నమోదు చేసిని పోలీసులు.. దర్యాప్తు చేపట్టారు.
ఇంట్లోకి దూసుకెళ్లిన ట్రక్కు.. నిద్రిస్తున్న ఇద్దరు మృతి: ఉత్తర్ప్రదేశ్ మెయిన్పురిలో ఓ ట్రక్కు అదుపుతప్పి రోడ్డు పక్కనున్న ఇంట్లోకి దూసుకెళ్లింది. ఈ ప్రమాదంలో నలుగురు అక్కడిక్కడే మరణించారు. ఇంట్లో నిద్రపోతున్న రిటైర్డ్ ఇన్స్పెక్టర్ దంపతులు సహా ట్రక్కులోని ఇద్దరు అక్కడిక్కడే మృతిచెందారు. మరో ఐదుగురికి గాయాలయ్యాయి. ప్రమాద సమయంలో ట్రక్కులో ఏడుగురు ప్రయాణికులు ఉన్నారని పోలీసులు తెలిపారు. ప్రస్తుతం ఇద్దరి పరిస్థితి విషమంగా ఉందని పోలీసులు చెప్పారు.