'భాజపా పుంజుకుంటోంది.. కాంగ్రెస్​ కనుమరుగవుతోంది'

దేశంలో ఎక్కడ ఏ ఎన్నికలు జరిగినా ప్రధాని నరేంద్ర మోదీ నేతృత్వంలోని భాజపాకే ప్రజలు బ్రహ్మరథం పడుతున్నారని కేంద్రమంత్రి ప్రకాశ్ జావడేకర్ అన్నారు. కాంగ్రెస్ మాత్రం​ కనుమరుగవుతోందన్నారు. ప్రస్తుతం దేశంలోని చాలా పార్టీలు కుటుంబ పార్టీలని, భాజపాకు మాత్రం పార్టీయే కుటుంబం అన్నారు.

ఇటీవల దేశంలో జరిగిన స్థానిక సంస్థల ఎన్నికలు, ఉపఎన్నికలు, మరే ఇతర ఎన్నికల్లో అయినా భాజపా విజయదుందుభి మోగించిందని హర్షం వ్యక్తం చేశారు కేంద్ర సమాచార శాఖ మంత్రి ప్రకాశ్ జావడేకర్​. ప్రధాని నరేంద్ర మోదీ నాయకత్వాన్ని ప్రజలు ఎంతగా విశ్వసిస్తున్నారో చెప్పేందుకు ఈ ఫలితాలే నిదర్శనమన్నారు. దేశంలో కాంగ్రెస్​ పార్టీ కనుమరుగైపోయే పరిస్థితి తలెత్తిందని వ్యాఖ్యానించారు.

ప్రస్తుతం దేశంలోని చాలా పార్టీలు కుటుంబ పార్టీలే అని జావడేకర్​ అన్నారు. తమకు మాత్రం భాజపా పార్టీయే కుటుంబమని చెప్పారు.

రాజస్థాన్​, గోవా, హైదరాబద్​లో ఇటీవల జరిగిన స్థానిక సంస్థల ఎన్నికల్లో భాజపాకు ప్రజలు బ్రహ్మరథం పట్టారని జావడేకర్​ అన్నారు. కాంగ్రెస్​ పార్టీని ప్రజలు తిరస్కరించారని పేర్కొన్నారు. రాజస్థాన్​లో 21 జిల్లా పరిషత్​లకు గాను భాజపా 13 స్థానాలు కైవసం చేసుకుందని, అక్కడ 20 ఏళ్లుగా అధికార పార్టీనే స్థానిక సంస్థల ఎన్నికల్లో విజయం వరిస్తున్నా ఈసారి ట్రెండ్ మారిందని వివరించారు. హైదరాబాద్​లో గత జీహెచ్​ఎంసీ ఎన్నికల్లో 4 స్థానాలకే పరిమితమైన భాజపా, ఈసారి 48 స్థానాలు గెలుచుకుందని గుర్తు చేశారు. గోవా, యూపీ, మధ్యప్రదేశ్​, మణిపుర్​, గుజరాత్.. ఇలా ఎక్కడ ఏ ఎన్నికలు జరిగినా భాజపానే ప్రజలు ఆదరిస్తున్నారని చెప్పారు.

జమ్ముకశ్మీర్​లో ఇటీవల జరిగిన డీడీసీ ఎన్నికల్లో భాజపా సత్తా చాటిందని, లోయలో అతిపెద్ద పార్టీగా అవతరించిందని జావడేకర్​ అన్నారు.

సీఎం అభ్యర్థిపై మౌనం..

తమిళనాడు అసెంబ్లీ ఎన్నికల్లో అధికార ఏఐఏడీఎంకేతో భాజపా పొత్తుపై ఇంకా స్పష్టత లేదు. కూటమి తరఫున సీఎం అభ్యర్థి పళనిస్వామే అని ఏఐఏడీఎంకే ఇప్పటికే ప్రకటించింది. అయితే ఈ విషయంపై స్పందించేందుకు జావడేకర్​ నిరాకరించారు. తమిళనాడు భాజపా నేతలు మాత్రం సీఎం అభ్యర్థి ఎవరనేది పార్టీ అధిష్ఠానం నిర్ణయిస్తుందని చెబుతున్నారు.

నాలుగు మీడీయా యూనిట్లను నేషన్​ల్ ఫిల్మ్​ డెవలప్​మెంట్​ కార్పొరేషన్​లో విలీనం చేసేందుకు కేంద్రం ఆమోదం తెలపడంపై జావడేకర్ స్పందించారు. దీనిని ఉపసంహరించుకునే అవకాశమే లేదని స్పష్టం చేశారు.