సీఎం అభ్యర్థిపై నిర్ణయం వారిదే: భాజపా

రానున్న తమిళనాడు అసెంబ్లీ ఎన్నికల్లో అన్నాడీఎంకే సీఎం అభ్యర్థిని.. ఆ పార్టీ నాయకులే నిర్ణయించుకుంటారని తమిళనాడు భాజపా ఇంఛార్జ్ సీటీ రవి స్పష్టం చేశారు. అయితే ఇప్పటికే అన్నాడీఎంకే..తమ పార్టీ సీఎం అభ్యర్థి పళనిస్వామి అని పలు మార్లు స్పష్టం చేసింది.

తమిళనాడు అసెంబ్లీ ఎన్నికలు దగ్గర పడుతోన్న వేళ అన్నాడీఎంకేపై ఆ రాష్ట్ర భాజపా ఇంఛార్జ్ సీటీ రవి కీలక వ్యాఖ్యలు చేశారు. పార్టీ సీఎం అభ్యర్థి ఎవరో అన్నాడీఎంకే నిర్ణయిస్తుందన్నారు. పొత్తులో అతిపెద్ద పార్టీ అన్నాడీఎంకే అని తెలిపారు.

సీఎం అభ్యర్థిని ఎన్​డీఏ అధిష్ఠానం నిర్ణయిస్తుందని తమిళనాడు భాజపా నేతలు అనుకున్నారు. కానీ కమలం పార్టీ వెనక్కి తగ్గింది.

కూటమిలో అతి పెద్ద పార్టీ అయిన అన్నాడీఎంకే నుంచే సీఎం అభ్యర్థి ఉంటారని భాజపా చెప్పుకుంటూ వచ్చింది. "కానీ అభ్యర్థి ఎవరు?.. అనేది ఎన్​డీఏ అధిష్ఠానం నిర్ణయిస్తుందని.. ముందే పళనిస్వామిని అనుకోవద్దు" అని తమిళనాడు భాజపా అధ్యక్షుడు ఎల్​. మురుగన్ ఇటీవల అన్నారు.

కానీ అన్నాడీఎంకే మాత్రం సీఎం అభ్యర్థి పళనిస్వామీ అని డిసెంబర్​ 27న జరిగిన ఎన్నికల ర్యాలీలో, జనవరి 9న నిర్వహించిన జనరల్ కౌన్సిల్​ సమావేశంలోనూ స్పష్టం చేసింది.

పొత్తు కావాలంటే స్వాగతించాల్సిందే..

పొత్తు కొనసాగాలంటే సీఎం అభ్యర్థిపై అన్నాడీఎంకే తీసుకునే నిర్ణయాన్ని కచ్చితంగా భాజపా స్వాగతించాలని ఆ పార్టీ..ఎన్నికల ప్రచారంలో తేల్చి చెప్పింది. రాష్ట్ర రాజకీయాల్లో జాతీయ పార్టీల ప్రభావం అంతగా ఉండదని అన్నాడీఎంకే సీనియర్ నేత కేపీ మునుస్వామి స్పష్టం చేశారు.

ఇదీ చదవండి :ఆమె నాకు తెలియదు: భార్యపై మాజీ సీఎం వ్యాఖ్యలు