'దిల్లీ సింహాసనం ముందు మోకరిల్లేది లేదు'

ఎలాంటి పరిస్థితుల్లోనూ దిల్లీ సింహాసనం ముందు మోకరిల్లే ప్రసక్తే లేదని స్పష్టం చేశారు నేషనలిస్ట్​ కాంగ్రెస్​ పార్టీ అధినేత శరద్​ పవార్​. మహారాష్ట్ర సహకార బ్యాంకు కుంభకోణం కేసుకు సంబంధించి ఎన్​ఫోర్స్​మెంట్​ కార్యాలయానికి ఈ నెల 27న తానే స్వయంగా వెళ్లి వివరాలు అందిస్తానని వెల్లడించారు. ఎన్నికల సమయంలో ఈడీ ఇలాంటి కేసులు పెట్టడమేంటని ప్రశ్నించారు.

మహారాష్ట్ర సహకార బ్యాంకు కుంభకోణం కేసుకు సంబంధించి ఎన్‌ఫోర్స్‌మెంట్ డైరెక్టరేట్ కార్యాలయానికి శుక్రవారం తానే స్వయంగా వెళ్తానని నేషనలిస్ట్​ కాంగ్రెస్​ పార్టీ (ఎన్​సీపీ) అధినేత శరద్ పవార్ వెల్లడించారు. ఈ కేసులో పవార్‌తో పాటు ఆయన మేనల్లుడు అజిత్‌ పవార్‌పై మనీలాండరింగ్ నిరోధక చట్టం కింద ఎన్​ఫోర్స్​మెంట్​ డైరెక్టరేట్​ (ఈడీ) కేసు నమోదు చేసింది.

అసెంబ్లీ ఎన్నికల ప్రచారంలో భాగంగా తాను ముంబయిలో ఉండకపోవచ్చని.. అంతమాత్రాన అందుబాటులో లేనట్లు అధికారులు చిత్రీకరించరాదని సూచించారు పవార్​. తానే వెళ్లి బ్యాంకు కుంభకోణానికి సంబంధించి వారికి కావల్సిన సమాచారమంతా ఇస్తానని చెప్పారు. ఎన్నికలకు ముందు ఈడీ ఇలాంటి చర్యలు చేపట్టడమేంటని ప్రశ్నించారు.

ఛత్రపతి శివాజీ మహారాజ్ సిద్ధాంతాలను పాటించే తాము.. దిల్లీ సింహాసనం ముందు మోకరిల్లే ప్రసక్తే లేదని తేల్చిచెప్పారు.

రాజకీయాన్ని ఆపాదించడం సరికాదు...

రూ.25వేల కోట్ల కుంభకోణానికి సంబంధించి హైకోర్టు ఆదేశాల మేరకే ఈడీ కేసు నమోదు చేసిందన్నారు మహారాష్ట్ర ముఖ్యమంత్రి దేవేంద్ర ఫడణవీస్. ఆ కేసుకు రాజకీయాన్ని ఆపాదించడం సరికాదని వ్యాఖ్యానించారు.

ఇదీ చూడండి: దేశ ఐక్యతకు పాటుపడే వారికి అత్యున్నత పౌర పురస్కారం