'పౌర' నిరసనకారులపై యూపీ ప్రభుత్వం 'ప్రతీకారం'

ఉత్తర్​ప్రదేశ్​ ప్రభుత్వం నిరసనకారులపై 'ప్రతీకారం' తీర్చుకునేందుకు సిద్ధమైంది. నిరసనల పేరిట ప్రభుత్వ ఆస్తులకు నష్టం కలిగించినవారిపై చర్యలు చేపడుతోంది. సీసీటీవీ దృశ్యాల ఆధారంగా ఆస్తి నష్టాలను అంచనా వేసేందుకు లఖ్​నవూలో నలుగురు సభ్యుల కమిటీని ఏర్పాటు చేసింది. విధ్వంసం సృష్టించిన వారిని గుర్తించి, వారి ఆస్తులను వేలం వేయాలని నిర్ణయించింది.

ఉత్తర్​ప్రదేశ్​లో 'పౌర' నిరసనలు గత కొన్ని రోజులుగా ఉద్ధృతంగా సాగుతున్నాయి. నిరసనల్లో ప్రభుత్వ ఆస్తులకు నష్టం కలిగించిన వారిపై ప్రతీకారం తీర్చుకుంటామని ఆ రాష్ట్ర ముఖ్యమంత్రి యోగి అదిత్యనాథ్​ హెచ్చరించిన కొద్ది రోజులకే అధికారులు ఆ దిశగా అడుగులు వేశారు. విధ్వంసకారుల వల్ల ధ్వంసమైన ఆస్తి వివరాలు సేకరించే పనిలో పడ్డారు. ఇందుకోసం నలుగురు సభ్యుల ప్యానెల్​ను ఏర్పాటు చేశారు లఖ్​నవూ జిల్లా పరిపాలనాధికారి. ధ్వంసమైన ఆస్తికి సమానమైన పరిహారాన్ని నిరసనకారుల నుంచే వసూలు చేసేలా చర్యలు తీసుకోనుందీ కమిటీ.

"సీసీటీవీ దృశ్యాల ఆధారంగా గోరఖ్​పుర్ పోలీసులు 50 మంది విధ్వంసకారుల చిత్రాలను గుర్తించారు. అన్ని చౌరస్తాల్లో, ముఖ్యమైన ప్రదేశాల్లో వారి చిత్రాలను అతికిస్తాం."
-వీపీ సింగ్​, కోత్వాలీ సర్కిల్​ ఆఫిసర్.

పౌరసత్వ సవరణ చట్టానికి వ్యతిరేకంగా జరిగిన నిరసనల్లో యూపీలో దాదాపు 16 మంది ప్రాణాలు కోల్పోగా.. అనేక స్థిర, చరాస్తులు ధ్వంసమయ్యాయి. నిరసనకారుల ఆస్తులను వేలం వేసి నష్టపరిహారం వసూలు చేస్తామని ఆదిత్యనాథ్​ స్పష్టం చేశారు. సుప్రీంకోర్టు ఆదేశాల మేరకు ఈ నిర్ణయం తీసుకున్నట్టు వెల్లడించారు.
ఇదీ చదవండి:'పిల్లలు ఆడుకునే బొమ్మలు 67% ప్రమాదకరమైనవే'