చైనా ఒకపక్క సైనిక వ్యవస్థ ఆధునికీకరణ వేగంగా చేసుకొంటూ పోతుండగా.. భారత్ మాత్రం నత్తనడకన ఆధునికీకరణ చేస్తోంది. చాలా సందర్భాల్లో ప్రభుత్వం ఆధునికీకరణ దేశ అవసరంగా పేర్కొంటున్నా.. ఆ మేరకు కేటాయింపులు మాత్రం ఉండటం లేదు. ఈ నేపథ్యంలో ఆరు నెలల క్రితం నేవీ చీఫ్ ఒక అంశాన్ని లేవనెత్తారు. దళాలు తమ ప్రాధాన్యాల ఎంపికలో ఇబ్బంది పడుతున్న విషయాన్ని ఆయన గుర్తించారు. వనరులు తగ్గిపోతుండటం వల్ల ఒత్తిడి పెరిగి ఈ రకమైన పరిస్థితి ఏర్పడుతుంది. వాయుసేన పరిస్థితి మరింత ఘోరంగా ఉంది.. ముందస్తు హెచ్చరిక వ్యవస్థలైన అవాక్స్(ఎయిర్‌బోర్న్‌ ఎర్లీ వార్నింగ్‌ అండ్‌ కంట్రోల్‌ సిస్టమ్‌) అమర్చిన విమనాలు భారత్ వద్ద నాలుగు ఉండగా.. పాక్‌ వద్ద 10 వరకు ఉన్నాయి. ఇది ప్రమాదకర పరిణామం.
నావికాదళ సామర్థ్యం..
దేశ అవసరాలకు తగ్గట్లు 2027 నాటికి భారత్ వద్ద 200 యుద్ధనౌకలు ఉండాల్సిన అవసరం ఉంది. ప్రస్తుతం ఉన్న పరిస్థితుల్లో 2027నాటికి కేవలం 175 మాత్రమే సమకూరే పరిస్థితి నెలకొంది. ఇప్పుడు దళం వద్ద 130 యుద్ధనౌకలు మాత్రమే ఉన్నాయి. మరో 50 వరకు నిర్మాణం, వివిధ దశల్లో ఉన్నాయి. మరోపక్క రక్షణ బడ్జెట్‌లో నావికాదళం వాటా 18శాతం(2012లో) నుంచి 2019-20లో 13శాతానికి పడిపోయింది. కాకపోతే నావికాదళం సబ్‌మెరైన్‌ విభాగాన్ని బలోపేతం చేసే సమయంలో ఈ తగ్గుదల కనిపించడం ఆందోళనకు గురిచేస్తోంది. 1980ల్లో భారత్ వద్ద 21 సబ్‌మెరైన్లు ఉన్నాయి.. ఇప్పుడు వాటి సంఖ్య 15కు పడిపోయింది. కాకపోతే అరిహంత్‌, చక్ర వంటి అణుశ్రేణి జలంతర్గాములు ఉండటం ఒక్కటే ఊరటనిచ్చే చర్య. ప్రస్తుతం ఉన్న వాటిల్లో కూడా చాలా వాటి జీవిత కాలం చరమ దశకు వచ్చింది. మరోపక్క చైనా మాత్రం దాదాపు 65 సబ్‌మెరైన్లతో భారత్‌పై కన్నేసి ఉంచింది.
అరకొర నిధులు..
రక్షణ నిధుల్లో సింహభాగం కేవలం జీతాలు, పింఛన్లకే వెళ్లిపోతుండటం వల్ల ఆధునికీకరణ ముందుకు సాగటంలేదు. ఒక వేళ కేటాయించినా అప్పటికే చేసిన కొనుగోళ్లకు చెల్లింపులకు ఇవ్వాల్సి వస్తోంది. దీంతో ఒక సారి భారీ కొనుగోళ్లు చేపడితే మరికొన్నేళ్లు కొత్త ఆయుధాలు ఊసెత్తలేని పరిస్థితి నెలకొంది. ప్రస్తుతం ఆర్థిక సంవత్సరంలో తొలిసారి బడ్జెట్‌ రూ.3లక్షల కోట్లను దాటింది. కానీ ఇది జీడీపీలో 2శాతం కంటే తక్కువ. మరోపక్క చైనా మాత్రం తన జీడీపీలో 3శాతం వరకు రక్షణ రంగంపై ఖర్చు చేస్తోంది. ఇక పాకిస్థాన్‌ అయితే ఏకంగా 3.5శాతం వెచ్చిస్తోంది. భారత్లో ప్రతి 1000 మంది ప్రజలకు 1.25 మంది సైనికులు ఉండగా.. చైనాలో ప్రతి 1000 మందికి 2.23 మంది సైనికులు.. పాక్‌లో 4.25 మంది సైనికులు ఉన్నారు. ఈ లెక్కన భారత్ దళాలను మెరుగుపర్చుకోవాల్సిన అవసరం ఉంది.
దిగుమతి చేసుకొనే రక్షణ రంగ ఉత్పత్తులపై కస్టమ్స్‌ డ్యూటీని తొలగించినట్లు గత బడ్జెట్‌లో సీతారామన్‌ వెల్లడించారు. ఈ నిర్ణయంతో దాదాపు రూ.25వేల కోట్ల వరకు ఆదా అయ్యే పరిస్థితి నెలకొంది.