ప్రజాసేవలో ఆమె చూపిన నిబద్ధత ప్రత్యేకం: మోదీ

విదేశాంగ శాఖ మాజీ మంత్రి, భాజపా దివంగత నేత సుష్మా స్వరాజ్​ జయంతి సందర్భంగా నివాళులర్పించారు ప్రధానమంత్రి నరేంద్ర మోదీ. ఆమె ప్రజాసేవలో నిబద్ధతగల వ్యక్తిగా.. గౌరవానికి ప్రతీకగా కొనియాడారు. సుష్మా జయంతిని పురస్కరించుకుని సాంస్కృతిక కేంద్రం, దౌత్యవేత్తలకు శిక్షణ ఇచ్చే సంస్థలకు ఆమె పేరు పెట్టింది కేంద్రం.

దివంగత నేత సుష్మా స్వరాజ్​ గౌరవానికి ప్రతీక అని పేర్కొన్నారు ప్రధానమంత్రి నరేంద్ర మోదీ. నేడు ఆమె 68వ జయంతి సందర్భంగా నివాళులర్పించారు. ప్రజాసేవలో నిబద్ధత కలిగిన వ్యక్తిగా పేర్కొంటూ ట్వీట్​ చేశారు.

విదేశాంగ శాఖ మాజీ మంత్రి సుష్మా.. భారతీయ విలువలకు నిలువెత్తు రూపమని..దేశాభివృద్ధి కోసం కలలు కనేవారని కొనియాడారు ప్రధాని. ఆమె అసాధారణమైన సహచరురాలని.. ఉత్తమ మంత్రిగా పేర్కొన్నారు.

మోదీ ట్వీట్​

సుష్మా స్వరాజ్​ భవన్..

సుష్మా స్వరాజ్​ జయంతిని పురస్కరించుకుని.. దిల్లీలోని సాంస్కృతిక కేంద్రం ప్రవాసి భారతీయ కేంద్రకు 'సుష్మా స్వరాజ్​ భవన్'​గా నామకరణం చేసింది కేంద్ర ప్రభుత్వం. అలాగే దౌత్యవేత్తలకు శిక్షణ ఇచ్చే విదేశీ సేవల సంస్థ ( ఫారెన్​ సర్వీస్​ ఇన్​స్టిట్యూట్​ )కి కూడా 'సుష్మా స్వరాజ్​ ఇన్​స్టిట్యూట్​ ఆఫ్​ ఫారెన్​ సర్వీస్'​ గా పేరు మార్చారు.

గతేడాది ఆగస్టు 6న గుండెపోటుతో ఆకస్మికంగా మరణించారు సుష్మా.

ఇదీ చూడండి:'మహోన్నత వ్యక్తిత్వం సుష్మాస్వరాజ్​ సొంతం'