ముఖ్యమంత్రి హామీతో శిరిడీ వివాదానికి తెర

మహారాష్ట్ర శిరిడీ సాయి జన్మభూమిపై చెలరేగిన వివాదానికి తెరపడింది. సమస్య పరిష్కారానికై సంబంధిత పక్షాల ప్రతినిధులతో జరిపిన చర్చల్లో ముఖ్యమంత్రి ఉద్ధవ్​ ఠాక్రే ప్రజల డిమాండ్లను అంగీకరించారు. శిరిడీవాసులకు భరోసా కల్పించారు. ఈ మేరకు ఆలయ ట్రస్ట్​ ప్రతినిధి మీడియాకు వెల్లడించారు.

మహారాష్ట్రలోని శిరిడీ సాయిబాబా జన్మస్థానంపై కొద్ది రోజులుగా చెలరేగిన వివాదం ఎట్టకేలకు ఓ కొలిక్కి వచ్చింది. ముఖ్యమంత్రి ఉద్ధవ్​ ఠాక్రే ప్రజల డిమాండ్లను అంగీకరించినట్లు తెలిపారు ఆలయ ట్రస్ట్​ ప్రతినిధి, భాజపా స్థానిక ఎమ్మెల్యే రాధాకృష్ణ పాటిల్​.

సాయి జన్మస్థల వివాద పరిష్కారానికై ముఖ్యమంత్రి ఉద్ధవ్​ ఠాక్రే ముంబయిలో.. సాయి సంస్థాన్​ ట్రస్ట్​ సీఈఓ, పలువురు మంత్రులు, ముఖ్య నేతలతో సమావేశమయ్యారు. సమస్యపై సుదీర్ఘంగా చర్చించన నేతలు కీలక నిర్ణయాలు తీసుకున్నట్లు సమాచారం. శిరిడీవాసుల డిమాండ్లను సీఎం అంగీకరించినట్లు ట్రస్ట్​ నేతలు వెల్లడించారు.

" ఈ చర్చలో ఠాక్రే ప్రజల డిమాండ్లకు అంగీకరించి... మరో వివాదం తలెత్తకుండా చర్యలు తీసుకుంటామని హామీ ఇచ్చారు. దీనికి శిరిడి ప్రజలు సంతృప్తి వ్యక్తం చేశారు. నేటితో ఈ వివాదానికి తెరపడినట్లే"

- రాధాకృష్ణ పాటిల్, ఆలయ ట్రస్ట్​ ప్రతినిధి, స్థానిక భాజపా ఎమ్మెల్యే

ఈ భేటీలో మంత్రులు బాలాసాహెబ్​, అజిత్​ పవార్​, ఆదిత్య ఠాక్రే, డీఎమ్​ ముగ్లికర్​ పాల్గొన్నారు.
ముఖ్యమంత్రి నిర్ణయంతో.. శిరిడీలో యథావిధిగా కార్యకలాపాలు సాగనున్నాయి.

ఇదీ వివాదం...

మహారాష్ట్ర పర్భాణీ జిల్లాలోని పాథ్రీ ప్రాంతం సాయి జన్మస్థానంగా పేర్కొంటూ.. వసతుల కల్పనకు రూ. 100 కోట్లు కేటాయించారు ముఖ్యమంత్రి ఉద్ధవ్​ ఠాక్రే. అయితే ఠాక్రే నిర్ణయం వల్ల.. శిరిడీలో ఆదరణ తగ్గిపోతుందని అక్కడి ప్రజలు ఆందోళన వ్యక్తం చేశారు. పాథ్రీ సాయి జన్మస్థలమని చెప్పేందుకు ఆధారాల్లేవని అభ్యంతరం వ్యక్తం చేస్తూ బంద్​ నిర్వహించారు.

ఇదీ చూడండి : భాజపా అధ్యక్షుడిగా నడ్డా ముందున్న సవాళ్లివే