2019 సాధారణ ఎన్నికల్లో అఖండ మెజారిటీ సాధించి.. కేంద్రంలో మరోమారు అధికారాన్ని చేజిక్కించుకుంది జాతీయ ప్రజాస్వామ్య కూటమి-ఎన్డీఏ. లోక్సభ ఎన్నికల్లో తిరుగులేని ఆధిపత్యాన్ని ప్రదర్శించిన భారతీయ జనతా పార్టీకి గతేడాది పలు రాష్ట్రాల అసెంబ్లీ ఎన్నికల్లో మాత్రం ఊహించని పరిణామాలు ఎదురయ్యాయి. ఝార్ఖండ్, మహారాష్ట్ర, ఛత్తీస్గఢ్, రాజస్థాన్, మధ్యప్రదేశ్ శాసనసభ పోరులో కమలం పార్టీ వెనకడుగువేసింది. ఫలితంగా అప్పటివరకు తమ గుప్పిట్లో ఉన్న ఆయా రాష్ట్రాల్లో పట్టు కోల్పోయింది. శివసేన లాంటి మిత్రపక్షాన్ని కూడా దూరం చేసుకుంది.
నడ్డాపైనే అందరికళ్లు
ఈ నేపథ్యంలో అమిత్ షా వారసుడిగా పార్టీని సమర్థంగా నడిపించే నాయకుడి కోసం వెతికారు కమలదళ నేతలు. సరికొత్త వ్యూహాలతో పార్టీని మరింత బలోపేతం చేస్తూ, తనదైన ముద్ర వేసే 'జగత్ ప్రకాశ్ నడ్డా' ఇందుకు అన్ని విధాలా సరైన వ్యక్తిగా భావించారు. మృదుస్వభావిగా పేరున్న నడ్డా.. భాజపాపై అసంతృప్తిగా ఉన్న కూటమి పార్టీలతో సానుకూల చర్చలు జరపగలరని ధీమాగా ఉన్నారు కమలనాథులు.
ఒక్కొక్కటిగా దూరమవుతున్న పార్టీలు
మహారాష్ట్ర ఎన్నికల్లో కలిసి పోటీచేసిన భాజపా-శివసేనకు అధికారం పంచుకునే విషయంలో భేదాభిప్రాయాలు తలెత్తాయి. ఫలితంగా అనూహ్య రీతిలో కాంగ్రెస్-ఎన్సీపీతో కలిసి ప్రభుత్వాన్ని ఏర్పాటు చేసింది శివసేన. కేంద్ర మంత్రివర్గంలో తమకు ప్రాధాన్యం కల్పించలేదన్న అసంతృప్తితో జేడీయూతో పాటు ఝార్ఖండ్ ఎన్నికలకు కొద్దిరోజుల ముందే ఏజేఎస్యూ(ఆల్ ఝార్ఖండ్ స్టూడెంట్స్ యూనియన్) పార్టీ సైతం కమలానికి మొహం చాటేసింది.
ఆరెస్సెస్ అధినేత మోహన్ భగవత్ ఇటీవల చేసిన 'ఆల్ ఇండియన్స్ ఆర్ హిందూ (భారతీయులందరూ హిందువులే)' వ్యాఖ్యలను ఎన్డీఏ భాగస్వామి అయిన 'రిపబ్లికన్ పార్టీ ఆఫ్ ఇండియా' ఖండించింది. 2018 ఏడాది ముగింపులో ఉపేంద్ర కుశ్వాహ 'రాష్ట్రీయ లోక్ సమతాపార్టీ' కూడా ఎన్డీఏ నుంచి వైదొలిగింది. జాతీయ ప్రజాస్వామ్య కూటమి నుంచి దూరమైన పార్టీలన్నీ.. "భాజపా అహంకార స్వభావంతో వ్యవహరిస్తోంది" అని ఆరోపించాయి. ఈ నేపథ్యంలో ప్రస్తుతం కొత్త అధ్యక్షుడు జేపీ నడ్డా.. కూటమి నేతలతో రోజువారీ చర్చలు జరపడంలో ప్రధానపాత్ర పోషించాల్సి ఉంది.
అయితే కూటమి పార్టీల నేతల్లో మరో భయం కూడా ఉంది. ఇచ్చిపుచ్చుకునే విషయంలో ఒకవేళ నడ్డాతో సానుకూల చర్చలు జరిగినప్పటికీ.. అమిత్ షాదే తుదినిర్ణయం అయినందున.. తమకు ప్రాధాన్యం దక్కదేమో అన్నది కూటమి నేతల అనుమానం. ఒకవేళ అదే జరిగితే నడ్డా చర్చలు నీరుగారే అవకాశమూ లేకపోలేదు. ఇలాంటి సందేహాలు నివృతి చేస్తూ... దిల్లీతో పాటు బిహార్లోనూ భాజపా గౌరవప్రదమైన సీట్లు సాధించేలా చూడాల్సిన బాధ్యత నడ్డాపై ఉంది.
ఇదీ చదవండి:'పోలీసులే దుప్పట్లు ఎత్తుకెళ్లారు'
