"రైతులు, నిరుద్యోగులను ఎన్డీఏ సర్కారు విస్మరించింది".... కాంగ్రెస్ అధ్యక్షుడు రాహుల్ గాంధీ పదేపదే చేసే విమర్శ. మరి కాంగ్రెస్ అధికారంలోకి వస్తే ఆ వర్గాల కోసం ఆయన ఏం చేస్తారు? ఎలాంటి కార్యక్రమాలు తీసుకొస్తారు? 'ఈనాడు' ముఖాముఖిలో ఈ ప్రశ్నలకు జవాబు చెప్పారు కాంగ్రెస్ అధ్యక్షుడు.
అధికారంలోకి వస్తే రైతులకు ఏం చేస్తారు?
రైతులు బాగుంటేనే దేశం బాగుంటుంది. రోజుకు రూ.3.50 చొప్పున నగదు బదిలీ చేస్తే.. రైతులను సంక్షోభం నుంచి బయట పడేసినట్టా? వారిని చిన్నచూపు చూడడమే అవుతుంది. మోదీ ప్రభుత్వం అదే చేస్తోంది. దేశంలో 15 మంది బడా వ్యాపారుల కోసం రూ. 3.50లక్షల కోట్ల రుణాలు రద్దు చేస్తారు. మరి రైతు రుణాలు ఎందుకు మాఫీ చేయరు? ధనికులకు ఒక నీతి, రైతులకో నీతా? మేం అధికారంలోకి వస్తే రుణమాఫీ చేస్తాం. రైతుల సమస్యల పరిష్కారానికి సాంకేతికతను పెంచాలి. అంతర్జాతీయ మార్కెటింగ్‌ సదుపాయం కల్పించాలి. వారి ఉత్పత్తులను నిల్వ చేసేందుకు శీతల గిడ్డంగులు, ఫుడ్‌ ప్రాసెసింగ్‌ యూనిట్లు ఏర్పాటు చేయాలి. తగినంత రుణం ఇవ్వాలి. దేశంలో రెండో హరిత విప్లవం అవసరం. రైతులకు ఆదాయం వచ్చేలా చూడాలి. వారి జీవితాల్లో సుస్థిరత అవసరం. ఇది కాంగ్రెస్ పార్టీతోనే సాధ్యం.
నిరుద్యోగులపై మోదీ ప్రభుత్వ వైఖరెలా ఉంది?
నైపుణ్యాలను ప్రదర్శించేందుకు మన దేశ యువత సిద్ధంగా ఉంది. అవకాశాలు మాత్రం లేవు. నిరుద్యోగాన్ని ఓ సమస్యగా గుర్తించడానికి కూడా ప్రధాని సిద్ధంగా లేరు. సమస్యను గుర్తించనప్పుడు ఇంకేం పరిష్కారం చూపుతారు? ఏడాదికి రెండు కోట్ల ఉద్యోగాలిస్తామని చెప్పి... ఉన్న ఉద్యోగాలను తీసేస్తున్నారు. మేం అధికారంలోకి వస్తే నిరుద్యోగ సమస్యలను తీరుస్తాం.
మరి ప్రభుత్వం వాదన వేరేలా ఉంది. నిరుద్యోగాన్ని పరిష్కరించామంటూ లెక్కలతో చెబుతోంది. ఏమంటారు?