'పార్టీ చిహ్నాలను తొలగించాలి- అవి రాజ్యాంగ విరుద్ధం'

ఎన్నికల విధానంలో భారీ సంస్కరణలు చేపట్టాల్సిన అవసరముందని అభిప్రాయపడ్డారు అన్నా హజారే. ముఖ్యంగా పార్టీ చిహ్నాలను తొలగించాలని డిమాండ్​ చేశారు. వీటి గురించి రాజ్యాంగంలో ఎక్కడా లేదని ఈటీవీ భారత్​ ప్రత్యేక ముఖాముఖిలో తెలిపారు.

ప్రజల్లో అవగాహన లేమి, ఎన్నికల్లో ఎలాగైనా గెలవాలన్న పార్టీల వ్యూహాలతో రాజకీయాలు భ్రష్టు పట్టిపోతున్నాయని సామాజిక కార్యకర్త అన్నా హజారే ఆవేదన వ్యక్తంచేశారు. ఈ పరిస్థితి నుంచి గట్టెక్కడానికి ఎన్నికల్లో భారీ సంస్కరణలు చేపట్టాల్సిన అవసరముందని ఈటీవీ భారత్​కు ఇచ్చిన ప్రత్యేక ఇంటర్వ్యూలో హజారే అభిప్రాయపడ్డారు.

పార్టీలకు సంబంధించిన ఎన్నికల చిహ్నాలను తొలగించాలని 81ఏళ్ల హజారే డిమాండ్ చేశారు. ఈ చిహ్నాలు రాజ్యాంగానికి విరుద్ధమన్నారు. రాజకీయం ప్రస్తుతం వేర్వేరు వర్గాల మధ్య పోటీలా తయారైందని, దేశంలో ఇదే అతిపెద్ద సమస్యని అభిప్రాయపడ్డారు హజారే. ఇలాంటి వర్గాలను రాజ్యాంగం ప్రోత్సహించదన్నారు.

ఇందుకు పరిష్కారంగా ఎన్నికల్లో భారీ సంస్కరణలు తీసుకురావాలని.. ఇందుకోసం స్వయంగా తానే ప్రజల్లో అవగాహన కల్పిస్తానని హజారే అన్నారు.

ఇదీ చూడండి- 'భాష' కోసం యుద్ధానికి సిద్ధం: కమల్​ హాసన్