సీఏఏపై ప్రతిపక్షాలవి అసత్య ప్రచారాలు: షా

పౌరసత్వ సవరణ చట్టంపై ప్రతిపక్షాలు అనవసర రాద్ధాంతం చేస్తున్నాయని ఆరోపించారు కేంద్ర హోం మంత్రి అమిత్​ షా. దేశంలో అరాచకం సృష్టిస్తున్నారని మండిపడ్డారు. ఇంటింటి ప్రచారం చేసి సీఏఏపై ప్రజలకు మరింత అవగాహన కల్పించాలని భాజపా కార్యకర్తలకు పిలుపునిచ్చారు.

పౌరసత్వ చట్టంపై ప్రతిపక్షాలు అనవసరంగా రాద్ధాంతం చేస్తూ అసత్యాన్ని ప్రచారం చేస్తున్నాయని కేంద్ర హోం మంత్రి అమిత్​ షా ఆరోపించారు. ఏ ఇతర విషయాలు లేకపోవటం వల్ల సీఏఏపై ప్రతిక్షాలు గగ్గోలు పెడుతున్నాయని మండిపడ్డారు.

గుజరాత్​ పోలీసులకు సంబంధించిన వివిధ ప్రాజెక్టుల ప్రారంభోత్సవ కార్యక్రమంలో పాల్గొన్నారు షా.

"ప్రతిపక్షాలు.. రాహుల్​ బాబా కంపెనీ, మమత బెనర్జీ, కేజ్రీవాల్​ కమ్యూనిస్టులు అందరూ సీఏఏపై అసత్య ప్రచారం చేస్తున్నారు. కోట్లాది మంది భాజపా కార్యకర్తలారా ఇంటింటికీ వెళ్లి ప్రజలకు సత్యాన్ని చేరవెయ్యండి. సీఏఏను ప్రజల్లోకి తీసుకెళ్లండి."

-అమిత్​ షా, కేంద్ర హోం మంత్రి

2014 డిసెంబర్​ 31 ముందు వరకు పాకిస్థాన్​, బంగ్లాదేశ్​, అఫ్గానిస్థాన్​ నుంచి వలస వచ్చిన ముస్లిమేతర ప్రజలకు పౌరసత్వం కల్పించడమే సీఏఏ ఉద్దేశం అన్నారు. ఇతరుల పౌరసత్వాన్ని తొలగించేందుకు కాదని పేర్కొన్నారు.

ఇదీ చూడండి : గ్యాస్​ కంపెనీలో పేలుడు... ఆరుగురు మృతి