గుడి దగ్గర మహిళ నగ్న మృతదేహం.. ఆమె తల ఎక్కడ?

మహారాష్ట్ర యావత్మల్​లో దారుణం వెలుగుచూసింది. ఓ గ్రామ దేవత గుడికి సమీపంలో ఓ మహిళ మృతదేహం తలలేకుండా, నగ్నంగా కనిపించడం స్థానికులను భయభ్రాంతులకు గురిచేసింది. ఘటనా స్థలంలో దొరికిన భయంకర ఆధారాలను బట్టి  క్షుద్రపూజల కోసం చేసిన నరబలిగా అనుమానిస్తున్నారు పోలీసులు.

మహారాష్ట్ర యావత్మల్​లో తలలేని ఓ మహిళ మృతదేహం తీవ్ర కలకలం రేపింది. భిల్వాడిలోని డిగ్రాస్​ వద్ద గ్రామ దేవత గుడి దగ్గర జరిగిన ఈ దారుణాన్ని నరబలిగా అనుమానిస్తున్నారు పోలీసులు.

గ్రామదేవత ఆలయ ప్రాంగణంలో రక్తపు మడుగులు, మూడు మానవ దంతాలు, సూదులు, చెవి పోగులు, చేతి గాజుల ముక్కలు చూసి ఇక్కడేదో జరిగిందని భావించారు స్థానికులు. గుడి పరిసరాలన్నీ క్షుణ్నంగా శోధించారు. గుడికి నాలుగు కిలోమీటర్ల దూరంలో 36 ఏళ్ల మహిళ మృతదేహం కనిపించింది. తల లేకుండా, నగ్నంగా ఉన్న ఆ శవాన్ని చూసి హడలిపోయారు వారంతా. వెంటనే పోలీసులకు సమాచారం ఇచ్చారు.

ఘటనా స్థలానికి చేరుకున్న పోలీసులు దర్యాప్తు చేపట్టారు. మహిళను గుర్తుపట్టేందుకు వీలు లేకుండా ఆమె కుడి చేతికి ఉన్న పచ్చబొట్టును చెరిపేందుకు, నరహంతకులు ఆమె చర్మాన్ని చెక్కినట్లు అధికారులు వెల్లడించారు. ఇప్పటి వరకు లభించిన ఆధారాలను బట్టి క్షద్రపూజల కోసం లేదా అక్రమ సంబంధాల కారణంగా ఇదంతా చేసి ఉంటారని అనుమానిస్తున్నారు. ప్రస్తుతం ఆమె తల కోసం గాలిస్తున్నారు పోలీసులు.

ఇదీ చదవండి:'నోట్లపై లక్షీదేవి ఉంటే 'రూపాయి' చల్లగా ఉంటుంది'