మోదీ అమెరికా పర్యటన.. భారత్​ శక్తి చాటడమే లక్ష్యం

భారత విజయాల్ని ప్రపంచానికి చాటడమే లక్ష్యంగా ప్రధాని నరేంద్ర మోదీ అమెరికా పర్యటన చేపడుతున్నారు. నేటి నుంచి వారం రోజులపాటు ఈ పర్యటన జరగనుంది. హ్యూస్టన్​లో నిర్వహించే అత్మీయ భేటీలో ప్రవాస భారతీయులను కలుసుకుంటారు. తరువాత అమెరికా అధ్యక్షుడు డొనాల్డ్ ట్రంప్​తో సమావేశమవుతారు. ఐక్యరాజ్యసమితిలో కీలక ప్రసంగాలు చేస్తారు. ఐరాసకు... భారత బహుమతిగా గాంధీ సోలార్​ పార్క్​ను ప్రారంభిస్తారు మోదీ.

పెట్టుబడుల ఆకర్షణ, సుస్థిర అభివృద్ధి లక్ష్యాల సాధనలో భారత్​ సాధించిన విజయాలను, మహాత్మాగాంధీ తత్వాన్ని ప్రపంచానికి చాటిచెప్పేందుకు ప్రధాని నరేంద్రమోదీ అమెరికా పర్యటన చేపడుతున్నారు. నేటి నుంచి వారం రోజులపాటు (21 నుంచి 27 వరకు) హ్యూస్టన్​, న్యూయార్క్​ల్లో జరిగే పలు కార్యక్రమాల్లో ఆయన పాల్గొంటారు.

మోదీ పర్యటన పూర్తి వివరాలు:ప్రధాని మోదీ అగ్రరాజ్య పర్యటన సాగనుందిలా..

భారత్ ప్రాధాన్యత..

గత 50 ఏళ్లలో ప్రపంచ పరిస్థితులు విపరీతంగా మారిన నేపథ్యంలో భారత ప్రాధాన్యం పెరిగిందని చాటిచెప్పడం కూడా మోదీ పర్యటనలో అంతర్లీనంగా ఉన్న ఆశయం. ఐక్యరాజ్యసమితిని సంస్కరించి అందులో భారత్​కు కీలక స్థానం లభించేలా చేయడమే ప్రధాని లక్ష్యంగా కనిపిస్తోంది.

"భారత్​ అవకాశాల నేల, విశ్వసనీయ భాగస్వామి. విశ్వనేత అని విశ్వాసం కలిగించేలా నా పర్యటన ఉంటుంది. అమెరికాతో ఉన్న సంబంధాలకు నా పర్యటన కొత్త శక్తిని ఇస్తుందని ఆశిస్తున్నా. రెండు ప్రజాస్వామిక దేశాల మధ్య వారధిలా నిలిచిన భారత సంతతి ప్రజలు, అమెరికాకు వారు అందిస్తున్న సేవలు మనందరికీ గర్వకారణం. కలిసి పనిచేయడం ద్వారా సురక్షిత, సుసంపన్న ప్రపంచాన్ని నిర్మించగలమని విశ్వసిస్తున్నా."
- అమెరికా పర్యటనకు వెళ్లే ముందు మోదీ ప్రకటన

హౌదీ అంటే..

అమెరికా నైరుతి ప్రాంతాల్లో స్నేహ పూర్వకంగా పిలిచే 'హౌ డు యూ డూ' (ఎలా ఉన్నారు?)ను సంక్షిప్తంగా 'హౌదీ' అంటారు. అందుకే ప్రాస కుదిరేలా.... కార్యక్రమానికి 'హౌదీ మోదీ' అని పేరు పెట్టారు.

హౌదీ మోదీ

మోదీ 2.0 ప్రభుత్వం ఏర్పడ్డాక మోదీ అమెరికా పర్యటనకు వెళ్లడం ఇదే మొదటిసారి. ఆదివారం హ్యూస్టన్​లో ప్రవాస భారతీయులతో 'హౌదీ మోదీ' కార్యక్రమంలో ప్రధాని మోదీ పాల్గొంటారు. ప్రవాసులను ఉద్దేశించి మాట్లాడతారు. ఈ కార్యక్రమంలో 50 వేల పైచిలుకు ప్రవాస భారతీయులు, చట్టసభ సభ్యులు పాల్గొనే అవకాశం ఉంది.

ఇదీ చూడండి:మోదీ-జిన్​పింగ్​ భేటీ నూతన వసంతాన్ని తెచ్చేనా!