సహజ వనరుల్లో చిత్తడి నేలల ప్రాముఖ్యం అంతా ఇంతా కాదు. నీటి నిల్వ లేదా అధిక తేమ ఎల్లప్పుడూ లేదా ఒకటి, రెండు రుతువులపాటు నిలిచి ఉండే భూమిని చిత్తడి నేలలు అంటారు. సముద్ర ప్రాంతాలు, నదీ తీరాలు, చెరువులు, సరస్సులు, నీటిముంపు ప్రాంతాలు, తీరాల సమీపంలోని ఉప్పునీటి కయ్యలు, మడ అడవులు, మానవ నిర్మిత చేపల చెరువులు, వరి పొలాలు, సాగునీటి ఆనకట్టలు వంటివి చిత్తడి నేలల కోవకు చెందుతాయి.
80శాతం మేర వరిసాగు...
మానవాళి మనుగడకు ఈ నేలలు ఎంతో కీలకం. నేడు మహా నగరాలుగా వృద్ధి చెందిన ముంబయి, కోల్‌కతా, చెన్నై, టోక్యో, న్యూయార్క్‌ వంటివన్నీ జలవనరుల చుట్టూ చిత్తడి నేలల ఆధారంగా వృద్ధి చెందినవే. ప్రపంచవ్యాప్తంగా 127.5 కోట్ల హెక్టార్ల విస్తీర్ణంలో వ్యాపించిన ఈ చిత్తడి నేలలు 15 లక్షల కోట్ల డాలర్ల వార్షిక ఆదాయం సమకూరుస్తున్నాయని అంచనా. ఇవి దాదాపు 18 శాతం జనాభాకు ప్రత్యక్షంగానో, పరోక్షంగానో జీవనోపాధి కల్పిస్తున్నాయి. భారత్‌లో 18.4 శాతం మేర భూభాగంలో ఆరు కోట్ల హెక్టార్ల పరిధిలో 19 రకాల చిత్తడి నేలలను గుర్తించారు. ఇవి సాగు, తాగునీరు అందిస్తూ ప్రత్యక్షంగా, పరోక్షంగా ఎంతోమందికి ఉపకరిస్తున్నాయి. దాదాపు 80 శాతం మేర వరిసాగు చిత్తడి నేలల పరిధిలోనే సాగుతోంది. పర్యావరణానికి, ఆహార భద్రతకు అపారంగా అక్కరకొచ్చే ఈ నేలలు ప్రపంచవ్యాప్తంగా క్రమంగా తగ్గిపోతుండటం ఆందోళన కలిగిస్తోంది.
ఆహార ఉత్పత్తికి, అపార మత్స్య సంపదకు ఊతమిస్తూ ఈ నేలలు కోట్లమందికి ఆహార భద్రత కల్పిస్తున్నాయి. భూమికి ఊపిరితిత్తులుగా పనిచేసే చిత్తడి నేలలు వరదలు, కరవు కాటకాల వంటి ప్రకృతి విపత్తుల నుంచి ప్రజలను కాపాడుతున్నాయి. ఈ నేలలు నీటిని వడబోసి, అందులోని విష కాలుష్యాలను వేరుచేసి, ఆ నీటిని తాగడానికి ఉపయుక్తంగా మారుస్తాయి. ప్రపంచంలోని దాదాపు 100 కోట్లమంది ప్రజలకు ఈ చిత్తడి నేలలు జీవనాధారంగా ఉపయోగపడుతున్నాయి. చిత్తడి నేలల్లో పెరిగే మడ అడవులు- తీవ్ర సముద్ర ఉప్పెనలు, వాయుగుండాల నుంచి తీరప్రాంత ప్రజలను కాపాడుతున్నాయి. ఈ నేలల్లోని వృక్ష సంపద- వాతావరణంలోని బొగ్గుపులుసు వాయువును శోషించి, శాశ్వతంగా స్థిరీకరించి, కాలుష్యాన్ని అడ్డుకుంటోంది. జీవ వైవిధ్యానికి పేరెన్నికగన్న ఈ నేలల్లో భూమ్మీద ఉండే వృక్ష, జంతు రాశుల్లో దాదాపు 40 శాతం మేర మనుగడ సాగిస్తున్నాయి.
వాణిజ్య భూములుగా మార్చడమే కారణం...
మానవాళికి మహోపకారమై నిలుస్తున్న ఈ చిత్తడి నేలలు ముప్పు అంచున కొట్టుమిట్టాడుతున్నాయి. 1900-2000 మధ్యకాలంలో ప్రపంచవ్యాప్తంగా 60 శాతం చిత్తడి నేలలు కనుమరుగయ్యాయని నివేదికలు వెల్లడిస్తున్నాయి. భారత్‌లో 1970 నుంచి 2015 వరకు 35శాతం చిత్తడి నేలలు అదృశ్యమైనట్లు పరిశోధనలు వెల్లడిస్తున్నాయి. వ్యవసాయ అవసరాలకోసం, పట్టణాల విస్తరణకు ఈ నేలలకు కృత్రిమంగా ‘మురుగు’ కల్పించి వీటిని వాణిజ్య భూములుగా మార్చేస్తుండటం ఇవి కనుమరుగు కావడానికి ముఖ్య కారణం. పరిశ్రమలనుంచి వెలువడే రసాయన కాలుష్యాలను, ఇతర వ్యర్థాలను ఈ నేలల్లోకి విడుదల చేస్తుండటంతో వీటి నాణ్యత, సామర్థ్యం బాగా తగ్గింది. వాతావరణ మార్పులు సైతం చిత్తడి నేలల జీవావరణాన్ని ఛిద్రం చేసి, ఆయా జీవుల మనుగడను దెబ్బతీస్తున్నాయి. వ్యవసాయ రంగంలో ఉపయోగించే రసాయన కాలుష్యాలు కూడా ఈ నేలల సామర్థ్యం తగ్గడానికి కారణమవుతున్నాయి. పట్టణాలు, నగరాల్లోని వ్యర్థాలను ఈ నేలల్లో పారవేస్తుండటంవల్ల ఇవి అంతరిస్తున్నాయి.