కేరళ రెస్టారెంట్లో వడ్డించే రోబో భామలు!
కేరళలోని కన్నూరులో ఓ రెస్టారెంట్లో అతిథులకు వడ్డించేందుకు రోబో సర్వర్ భామలు చైనా నుంచి వచ్చేశారు. ఆడపిల్లల దుస్తుల్లో అందంగా కదిలే ఈ ముగ్గురు రోబో సర్వర్లను 'బీ @ కివిజో' అనే రెస్టారెంట్ వారు దిగుమతి చేసుకున్నారు. ఐదడుగుల ఎత్తుండే ఒక్కో రోబోకి 15 లక్షల రూపాయలు వెచ్చించి కొనుగోలు చేశారు. వాటికి అలీనా, హెలెన్, జేన్ అని పేర్లు కూడా పెట్టారు.
ఈ రెస్టారెంట్లో వినియోగదారులు తమ టేబుల్ మీద ఉండే ట్యాబ్లో ఆహారాన్ని ఆర్డర్ చేస్తారు. షెఫ్లు వంటకాలు సిద్ధం చేయగానే రోబోలు ప్రేమగా పలకరించి మరీ అతిథులకు ఆహారం అందిస్తాయి. జ్యూస్బాక్స్, బేకింగ్ మమ్మీ అనే కేఫ్ల నుంచి ఆర్డర్లను కస్టమర్లకు అందిస్తాయి ఈ రోబోలు. అంతే కాదండోయ్.. పిల్లలకు బోర్ కొట్టకుండా ఆడించేందుకు ఇక్కడో నాలుగడుగుల పిల్ల రోబో కూడా ఉంది.