జేఎన్​యూ దాడి: అనుమానితుల చిత్రాల్లో అయిషీ ఘోష్​

జేఎన్​యూలోని పెరియార్​ వసతి గృహంలో హింసాత్మక దాడికి పాల్పడింది వామపక్ష విద్యార్థి నేతలేనని ప్రత్యేక దర్యాప్తు బృందం తేల్చింది. ఈ మేరకు దాడి చేసినట్లు అనుమానిస్తున్న తొమ్మిది మంది చిత్రాలను విడుదల చేశారు సిట్​ అధికారి డాక్టర్​ జాయ్​ తిర్కే. ఇందులో జేఎన్​యూఎస్​యూ అధ్యక్షురాలు అయిషీ ఘోష్​ కూడా ఉన్నట్లు తెలిపారు. ఈ ప్రకటనపై అభ్యంతరం వ్యక్తం చేశారు ఘోష్​.

జవహార్​ లాల్​ నెహ్రూ విశ్వవిద్యాలయంలో గత ఆదివారం జరిగిన హింసాత్మక దాడిపై విచారణ చేపట్టిన ప్రత్యేక దర్యాప్తు బృందం వివరాలను బహిర్గతం చేసింది. పెరియార్ వసతి గృహంలో వామపక్ష విద్యార్థి సంఘాలే దాడికి పాల్పడ్డాయని తేల్చింది. ఇందుకు సంబంధించిన చిత్రాలను మీడియాతో పంచుకున్నారు సిట్​ అధికారి డాక్టర్​ జాయ్​ తిర్కే.

దాడి చేసినట్లుగా అనుమానిస్తున్న తొమ్మిది మంది పేర్లను వెల్లడించారు తిర్కే. ఇందులో జేఎన్​యూఎస్​యూ అధ్యక్షురాలు అయిషీ ఘోష్​ కూడా ఉన్నట్లు స్పష్టం చేశారు. ఈ తొమ్మిదిలో వామపక్ష విద్యార్థి సంఘాలకు చెందినవారు ఏడుగురు ఉండగా.. ఇద్దరు మితవాద సంఘాలకు చెందిన వారని పోలీసులు తెలిపారు.వారందరికీ నోటీసులు జారీ చేశామన్న డీసీపీ....అయితే ఇప్పటివరకూఎవర్నీ అరెస్ట్‌ చేయలేదన్నారు. త్వరలోనే అనుమానితులను విచారణ చేయనున్నట్లు జాయ్‌ తిర్కే చెప్పారు.

9 మంది వీరే..

చంచన్​ కుమార్​, పంకజ్​ మిశ్రా, అయిషీ ఘోష్, భాస్కర్ విజయ్​, సుచేతా తాలుక్​రాజ్​, ప్రియా రంజన్​, దోలన్​ సావంత్​, యోగేంద్ర భరద్వాజ్​, వికాస్​ పటేల్ ఈ దాడిలో పాలుపంచుకున్నట్లు తెలిపారు.

ఎక్కువ మంది విద్యార్థులు జనవరి 1-5 మధ్య శీతకాల సెమిస్టర్​ కోసం పేర్లు నమోదు చేసుకోవాలనుకున్నారు. కానీ వామపక్ష విద్యార్థి నేతలు అందుకు ఒప్పుకోలేదు.

జనవరి 5న పెరియార్​ వసతి గృహంలో లక్ష్యంగా చేసుకున్న కొన్ని గదులపైనే దాడి జరిగిందని తిర్కే చెప్పారు.

ఘోష్​ స్పందన

పోలీసుల ప్రకటనపై స్పందించారు అయిషీ ఘోష్​. తనపై దాడి జరిగిందనడానికి ఆమె వద్ద ఆధారాలు ఉన్నట్లు తెలిపారు.

"దేశంలోని న్యాయచట్టాలపై పూర్తి నమ్మకం ఉంది. విచారణ సక్రమంగా జరిగితే నాకు న్యాయం లభిస్తుంది. కానీ దిల్లీ పోలీసులు ఎందుకు పక్షపాతంగా వ్యవహరిస్తున్నారు? నా ఫిర్యాదు ఇస్తే ఎఫ్​ఐఆర్​ ఎందుకు దాఖలు చేయలేదు? నేను ఎవరిపైన దాడి చేయలేదు. నామీద జరిగిన దాడికి నా వద్ద ఆధారాలు ఉన్నాయి."

- అయిషీ ఘోష్​, జేఎన్​యూఎస్​యూ అధ్యక్షురాలు

ఇక చాలు: జావడేకర్​

పోలీసుల ప్రకటనపై స్పందించిన కేంద్రమంత్రి ప్రకాశ్​ జావడేకర్​.. ఇకనైనా అల్లర్లను ఆపేసి విద్యాసంవత్సరం ప్రారంభించాలని సూచించారు. వామపక్ష పార్టీలు, ఆమ్​ఆద్మీ.. విద్యార్థులను రాజకీయ అవసరాల కోసం వాడుకుంటున్నారని ఆరోపించారు. ఏబీవీపీ సంస్థపై నింద వేసేందుకు చేసిన ప్రయత్నాలను పోలీసులు తేటతెల్లం చేశారని పేర్కొన్నారు.