'నీతులు మాని.. సిక్కులపై దాడి చేసిన వారిని శిక్షించండి'

పాకిస్థాన్​లోని పెషావర్​లో సిక్కు వర్గానికి చెందిన ఓ వ్యక్తిని ఎవరో గుర్తుతెలియని వ్యక్తులు హత్య చేశారు. సిక్కులే లక్ష్యంగా పాక్​లో జరుగుతోన్న విధ్వంసకాండను భారత్ తీవ్రంగా​ ఖండించింది. పాక్​ ఇప్పటికైనా అసత్యాలు పలకడం మానేసి.. దోషులను కఠినంగా శిక్షించాలని డిమాండ్​ చేసింది.

పాకిస్థాన్​లో సిక్కులపై దాడులు పెచ్చుమీరుతున్నాయి. పవిత్ర నన్​కానా సాహిబ్​ గురుద్వారాపై దాడిని మరువకముందే పెషావర్​లో ఓ సిక్కు యువకుడిని కొంతమంది దుండగులు హతమార్చారు. సిక్కులపై పాకిస్థాన్​లో జరుగుతోన్న విధ్వంసాన్ని భారత్​ తీవ్రంగా ఖండించింది. పాకిస్థాన్ అసత్యాలు పలకడం మానేసి నేరాలకు పాల్పడిన వారిని అరెస్ట్​ చేయాలని భారత్​ డిమాండ్​ చేసింది. ఈ మేరకు భారత విదేశాంగ మంత్రిత్వ శాఖ ప్రకటన విడుదల చేసింది.

పెషావర్​లో సిక్కు యువకుడిని అత్యంత కిరాతకంగా హతమార్చడాన్ని భారత్​ తీవ్రంగా ఖండిస్తోంది. ఇటీవల నన్​కానా సాహిబ్​ గురుద్వారాపై జరిగిన దాడి, బలవంతంగా ఓ సిక్కు అమ్మాయికి మత మార్పిడి చేసి వివాహం చేసుకున్న ఘటనలపై పాక్​ ప్రభుత్వం ఇంకా ఎలాంటి చర్యలు తీసుకోలేదు.

- భారత విదేశాంగ మంత్రిత్వ శాఖ

పాకిస్థాన్​ ప్రభుత్వం ఇతర దేశాలకు ఉపన్యాసాలు ఇవ్వడం మానేసి.. సొంత మైనారిటీల రక్షణ కోసం పనిచేయాలని ఎమ్​ఈఏ పేర్కొంది. ఇటీవల పాక్​లోని నన్​కానా సాహిబ్ గురుద్వారా​ వద్ద జరిగిన విధ్వంసాన్ని భారత్​ తీవ్రంగా ఖండించింది. అక్కడి సిక్కు ప్రజల భద్రతకై తక్షణ చర్యలు తీసుకోవాలని పొరుగుదేశాన్ని డిమాండ్​ చేసింది భారత్​.

ఇదీ చూడండి:అలర్ట్​: యూపీలో చొరబడిన ఇద్దరు ఐసిస్​ ఉగ్రవాదులు!