'బడాబాబులకు రూ.68 వేల కోట్ల రుణమాఫీ'

కేంద్ర ప్రభుత్వంపై కాంగ్రెస్​ తీవ్ర స్థాయిలో మండిపడింది. బడా రుణ ఎగవేతదారుల అప్పులను మోదీ ప్రభుత్వం మాఫీ చేసిందని ఆరోపించింది. వీటి విలువ రూ.68వేల 607 కోట్లని పేర్కొంది. ఈ మేరకు స.హ చట్ట ద్వారా దాఖలైన ఓ ప్రశ్నకు ఆర్​బీఐ ఇచ్చిన జవాబును ఆధారంగా చూపించింది కాంగ్రెస్​.

దేశంలోని రుణ ఎగవేతదారుల జాబితాలోని తొలి 50 మందికి సంబంధించిన రూ. 68వేల 607 కోట్లను కేంద్రం మాఫీ చేసిందని కాంగ్రెస్​ ఆరోపించింది.ఈ మేరకు స.హ చట్ట ద్వారా అడిగిన ఓ ప్రశ్నకు రిజర్వు బ్యాంక్​ ఆఫ్​ ఇండియా(ఆర్​బీఐ) ఇచ్చిన జవాబును ఆధారంగా చూపించింది.

2014 నుంచి 109సెప్టెంబర్​ మధ్య కాలంలో ప్రధానమంత్రి నరేంద్ర మోదీ ప్రభుత్వం రూ. 6.66 లక్షల కోట్లు విలువ గల రుణాలను మాఫీ చేసిందని ఆరోపించింది కాంగ్రెస్​.

తొలి 50మంది బ్యాంకుల రుణ ఎగవేతదారుల పేర్లను బయటపెట్టాలని పార్లమెంట్​ వేదికగా తాను ప్రశ్నించినట్టు కాంగ్రెస్​ సీనియర్​ నేత రాహుల్​ గాంధీ గుర్తుచేశారు.

"పార్లమెంట్​లో నేను ఒక ప్రశ్న సూటిగా అడిగాను. తొలి 50 మంది రుణ ఎగవేతదారుల పేర్లు చెప్పమన్నాను. అప్పుడు సమాధానం చెప్పడానికి ఆర్థిక మంత్రి నిరాకరించారు. ఇప్పుడు బ్యాంకు మోసాలంటూ.. నీరవ్​ మోదీ, మెహుల్​ ఛోక్సీతో పాటు అనేక మంది భాజపా మిత్రుల పేర్లను జోడించి ఓ జాబితాను రూపొందించింది ఆర్​బీఐ. ఆ రోజు పార్లమెంట్​లో ఇందుకే నిజాన్ని దాచారు."

-- రాహుల్​ గాంధీ, కాంగ్రెస్​ సీనియర్​ నేత

'మోదీ స్పందించాల్సిందే...'

ఈ వ్యవహారంపై ప్రధాని మోదీ స్పందించాలని డిమాండ్​ చేశారు కాంగ్రెస్​ ప్రతినిధి రణదీప్​ సుర్జేవాలా. అసలు వాళ్ల రుణాలను ఎందుకు మాఫీ చేశారో మోదీ స్పష్టం చేయాలని తెలిపారు.

కరోనాపై పోరులో రాష్ట్రాలకు సహాయం చేసేందుకు నిధులు లేవు కానీ.. మెసగాళ్ల రుణాలను మాఫీ చేసేంత దయాగుణం మాత్రం కేంద్రానికి ఉందని మండిపడ్డారు సుర్జేవాలా.

ఇదీ చూడండి:-'ఒకే దేశం- ఒకే రేషన్ ​కార్డు అమలు సాధ్యమా?'