ఎఫ్​​డీఐ నిబంధనలు సడలిస్తూ కేంద్రం కీలక నిర్ణయాలు

ఆర్థిక మాంద్యం పొంచి ఉందన్న అంచనాల నేపథ్యంలో వృద్ధికి ఊతమిచ్చే దిశగా వరుస నిర్ణయాలు తీసుకుంటోంది కేంద్ర ప్రభుత్వం. తాజా కేబినెట్​ భేటీలోనూ విదేశీ ప్రత్యక్ష పెట్టుబడులు(ఎఫ్​డీఐ) పెంచేందుకు.. నిబంధనలను సరళీకరించేందుకు నిర్ణయించింది. బొగ్గు, ఒప్పంద తయారీ రంగాల్లో వంద శాతం ఎఫ్​డీఐలను అనుమతించాలని నిర్ణయం తీసుకుంది. 75 నూతన వైద్య కళాశాలల ఏర్పాటుకు కేబినెట్​ ఆమోదం తెలిపింది.

దేశ ఆర్థిక రంగానికి చేయూత అందించే దిశగా నిర్ణయాలు తీసుకుంది కేంద్ర కేబినెట్. వివిధ రంగాల్లో విదేశీ ప్రత్యక్ష పెట్టుబడులను (ఎఫ్​డీఐ)లను పెంచే దిశగా అడుగులు వేసింది. కేబినెట్ నిర్ణయాలను సీనియర్ మంత్రులు ప్రకాశ్​ జావడేకర్​, పీయూష్​ గోయల్ ప్రకటించారు.

"ఆర్థిక ప్రగతి కోసం ఇంతకుముందు విదేశీ రుణాలను ఎక్కువగా తీసుకునేవారు. కానీ మోదీ ప్రభుత్వం గత ఐదేళ్లలో విదేశీ నిధులను ఎఫ్​డీఐల రూపంలో ఎక్కువగా తీసుకొచ్చింది. మా ప్రభుత్వంలో 286 బిలియన్​ డాలర్ల విదేశీ నిధులు ఎఫ్​డీఐల రూపంలో భారత్​కు వచ్చాయి. ఈ నేపథ్యంలోనే భారత్​కు మరిన్ని విదేశీ ప్రత్యక్ష పెట్టుబడులను తీసుకువచ్చేందుకు నిర్ణయం తీసుకున్నాం. ఎఫ్​డీఐ నిబంధనలు కఠినతరంగా ఉన్నాయి. వాటిని సరళీకరించి పెట్టుబడులను పెంచే దిశగా అడుగులు వేస్తున్నాం. దీనితో పాటు సులభతరంగా వ్యాపారం చేసుకునే అవకాశాలు మెరుగవుతాయి."

-పీయూష్ గోయల్, కేంద్రమంత్రి

కేబినెట్ నిర్ణయాలు:

• బొగ్గు గనుల తవ్వకాలు, కాంట్రాక్టు తయారీ రంగాల్లో 100 శాతం విదేశీ ప్రత్యక్ష పెట్టుబడులకు అనుమతిస్తూ నిర్ణయం.
• డిజిటల్ మీడియాలో 26 శాతం ఎఫ్​డీఐలకు అనుమతి.
• 75 నూతన వైద్య కళాశాలల ఏర్పాటు. 24 వేల 375 కోట్లవ్యయంతో ఏర్పాటయ్యే కళాశాలల ద్వారా 15, 700 నూతన ఎంబీబీఎస్ సీట్లు అందుబాటులోకి వచ్చే అవకాశం.
• చెరకు రైతులకు ప్రోత్సాహం కల్పించేందుకు 6268 వేలకోట్ల ఎగుమతి రాయితీ ప్రకటన.
• విపత్తు నిరోధక మౌలిక సదుపాయాల కోసం అంతర్జాతీయ కూటమి(సీఆర్​డీఐ) ఏర్పాటుకు నిర్ణయం. ఐక్యరాజ్యసమితి వాతావరణ సదస్సులో ప్రధానమంత్రి నరేంద్ర మోదీ ప్రారంభించనున్నట్లు ప్రకటన.

ఇదీ చూడండి: గొప్ప ప్రదేశాల్లో ఐక్యతా విగ్రహానికి చోటుపై మోదీ హర్షం