ఝార్ఖండ్ పశ్చిమ సింగభూమ్ జిల్లా బురుగులికేరా గ్రామంలో మంగళవారం రాత్రి జరిగిన ఏడు ఘోర హత్యలు... ఆ ప్రాంతంలో తీవ్ర భయాందోళనలకు దారితీశాయి. పథ్తల్గడీని వ్యతిరేకించి, హత్యకు గురైన వారిలో గ్రామపంచాయతీ అధికారి ఉన్నారు.
ఏడుగురు గ్రామస్థులను దారుణంగా హత్య చేశారన్న సమాచారంతో గ్రామంలోకి వచ్చిన పోలీసులు రాత్రంతా గాలించారు. చివరకు గ్రామానికి 4 కిలోమీటర్ల దూరంలో ఉన్న అడవిలో 7 మృతదేహాలను గుర్తించారు.
'పథ్తల్గడీ' వివాదం
పథ్తల్గడీ ఉద్యమంపై బురుగులికేరాలో మంగళవారం రాత్రి సమావేశం జరిగింది. ఉద్యమ మద్దతుదారులకు, వ్యతిరేకించేవారికి మధ్య ఘర్షణ తలెత్తింది. ఈ క్రమంలోనే పథ్తల్గఢీ మద్దతుదారులు ఏడుగురు గ్రామస్థులను అహహరించి అడవిలోకి తీసుకెళ్లారు. అనంతరం వారి వద్ద ఉన్న లాఠీలు, గొడ్డళ్ల వంటి ఆయుధాలతో ఏడుగురిని హత్య చేసినట్లు పోలీసులు తెలిపారు.
సీఎం దిగ్భ్రాంతి
ఏడు హత్యల ఘటనపై ఝార్ఖండ్ సీఎం హేమంత్ సోరెన్ దిగ్భ్రాంతి వ్యక్తం చేశారు. చట్టం ముందు ఎవరూ ఎక్కువ కాదని, ఘటనకు పాల్పడిన వారిని వదిలేది లేదని తేల్చి చెప్పారు. ఇలాంటి ఘటనలు పునరావృతం కాకుండా నియంత్రించేందుకు ఉన్నత స్థాయి సమావేశం ఏర్పాటు చేయనున్నట్లు తెలిపారు.
పథ్తల్గఢీ ఉద్యమం..
తమ గ్రామంలోని గిరిజనులకు స్వతంత్ర హోదా ఉండేలా.. అటవీ భూవిు, నదులపై ప్రభుత్వ చట్టాలను వర్తింపజేయకూడదని కొందరు చేపట్టిన ఉద్యమం పేరు 'పథ్తల్గఢీ'. ఉద్యమంలో భాగంగా గ్రామంలోకి ఇతరులకు అనుమతి లేదని ఊరి పొలిమేరలో బోర్డు పెడతారు. 2019 మధ్యకాలం నుంచి ఈ ఉద్యమం వార్తల్లో నిలిచింది.
2019 జూన్ 19న ఖుంతి జిల్లాలో ఐదుగురు స్వచ్ఛంద సంస్థ కార్యకర్తలను అపహరించి అత్యాచారం చేశారు పథ్తల్గఢీ ఉద్యమ మద్దతుదారులు. పాఠశాల ఆవరణలో కార్యక్రమం నిర్వహిస్తున్న వారిపై ఇతరులనే నెపంతో దారుణానికి ఒడిగట్టారు.
ఈ ఘటన తర్వాత వారం రోజులకే అదే జిల్లాలో భాజపా మాజీ ఎంపీ నివాసానికి భద్రత కల్పిస్తున్న ముగ్గురు సిబ్బందిని అపహరించారు పథ్తల్గఢీ మద్దతుదారులు. ఆ తర్వాత వారిని విడుదల చేశారు.
మావోయిస్టు జిల్లాల్లో ప్రభావం
పథ్తల్గఢీ ఉద్యమ ప్రభావం ఝార్ఖండ్లో ప్రధానంగా నాలుగు జిల్లాల్లో ఉంది. మవోయిస్టు ప్రాంతాలైన ఖుంతి, గుమ్లా, సిందేగా, పశ్చిమ్ సింగభూమ్ ప్రాంతాల్లో అధికంగా ఉంది.
పథ్తల్గఢీ ఉద్యమానికి సంబంధించి, చోటానాగ్పుర్ టెనాన్సీ చట్టం(సీఎన్టీఏ), సంతల్ పరగాణ టెనాన్సీ చట్టం(ఎస్పీటీఏ)లకు వ్యతిరేకంగా నిరసనలు చేపట్టిన వారిపై నమోదైన దేశద్రోహం కేసులను వెనక్కి తీసుకుంటామని ముఖ్యమంత్రి బాధ్యతలు చేపట్టిన అనంతరం ప్రకటించారు హేమంత్ సోరెన్.
ఇదీ చూడండి: కశ్మీర్లో ఉగ్రదాడికి భారీ కుట్ర- కేంద్ర హోంశాఖ అప్రమత్తం
