భార్యాభర్తల గొడవలో తల దూర్చిన వాలంటీర్ - భర్తపై గొడ్డలితో దాడి! - వైసీపీ వాలంటీర్ పై కేసు

Village volunteer attack on neighbor: భార్యాభర్తల గొడవలో తల దూర్చిన వాలంటీర్.. భర్తపై దాడి చేశాడు. గాయాల పాలైన బాధితుడు   ఆసుపత్రిలో చికిత్స పొందుతున్న ఘటన అనంతపురం జిల్లా కుందుర్పి మండలం తూముకుంట గ్రామంలో చోటుచేసుకుంది. బాధితుడు తెలిపిన వివరాల ప్రకారం... తూముకుంట గ్రామంలో రామచంద్ర అనే వ్యక్తికి తన భార్యకూ గత కొంత కాలంగా వివాదం కొనసాగుతుంది.

 ఈ రోజు ఆమె తరఫు బంధువులు వచ్చి సర్ది చెప్పే  ప్రయత్నం చేశారు. ఈ నేపథ్యంలో  రామచంద్ర తన భార్యతో గొడవ పడుతుండగా పక్కనే ఉన్న గ్రామ వాలంటీర్ రాము తల్లిదండ్రులు వచ్చి సర్ది చెప్పడానికి ప్రయత్నించారు. మాటా మాట పెరిగి రామచంద్రకు, వాలంటీర్ రాము తల్లిదండ్రుల మధ్య వాగ్వాదం చోటుచేసుకుంది. గొడవ విషయం తెలుసుకున్న వాలంటీర్ రాము.. రామచంద్రపై గొడ్డలితో  దాడి చేశాడు. ఈ దాడిలో  రామచంద్రకు తీవ్ర గాయాలయ్యాయి. అతడిని కళ్యాణదుర్గం ప్రభుత్వ ఆసుపత్రికి తరలించారు. ప్రస్తుతం రామచంద్ర ఆసుపత్రిలో చికిత్స పొందుతున్నాడు.  తన భార్య తరఫు వారితో కలిసి సమస్యను పరిష్కరించుకుంటామని తెలిపినా.. వాలంటీర్ రాము వినకుండా.. తనపై దాడి చేశాడని రామచంద్ర వాపోయాడు. వాలంటీర్ రాముపై పోలీసులకు ఫిర్యాదు చేయనున్నట్లు పేర్కొన్నాడు.