రైతుల సమస్యలు పట్టించుకోని వైసీపీ నేతలు ఎన్నికల్లో ఓట్లు ఎలా అడుగుతారు ?: కాలవ శ్రీనివాసులు

Farmers Try To Save Crop With Tankers Water: తుంగభద్ర జలాశయంలో రాష్ట్ర వాటా మూడున్నర టీఎంసీల నీరు ఉందన్న విషయం కూడా ఇరిగేషన్ మంత్రి అంబటి రాంబాబుకు తెలియకపోవటంతో రైతులకు తీవ్ర అన్యాయం జరిగిందని మాజీ మంత్రి కాలవ శ్రీనివాసులు విమర్శించారు. బొమ్మనహాల్ మండలంలో హెచ్ఎల్​సీ ఆయకట్టు కింద ఎండిపోతున్న పంటలను పరిశీలించి, రైతుల కష్టాన్ని తెలుసుకున్నారు. నీటి నిర్వహణ కూడా చేతకాని జగన్ ప్రభుత్వంతో హెచ్ఎల్​సీ ఆయకట్టు రైతులకు వందల కోట్ల రూపాయలు నష్టం జరిగిందన్నారు. తుంగభద్ర ఎగువ కాలువకు నీటిని నిలిపివేయటంతో రైతులు ట్యాంకర్లతో పంటను రక్షించుకునే ప్రయత్నం చేస్తున్నారని ఆవేదన వ్యక్తం చేశారు. రైతుల సమస్యలు పట్టని వైసీపీ ప్రజాప్రతినిధులు ఎన్నికల్లో ఏ ముఖం పెట్టుకొని ప్రజలను ఓట్లు అడగటానికి పోతారని శ్రీనివాసులు ప్రశ్నించారు.

మామూలుగా పంటలు ఎండిపోయాయంటే ప్రకృతి కరుణించక అనుకుంటాం. కానీ ఇక్కడ పాలకుల పాపం వల్ల ఈ పంటలు నిలువునా ఎండిపోతున్నాయి. తుంగభద్ర జలాశయంలో రాష్ట్ర వాటా మూడున్నర టీఎంసీల ఉన్న నీటిని ఉపయోగించుకోవడం లేదు. ఒక్క టీఎంసీ నీటిని తీసుకొచ్చిన ఈ పంటలన్నీ పండేవి. కానీ ఎవ్వరికీ నీటిపై శ్రద్ధ లేదు. ఇరిగేషన్ మంత్రి అంబటి రాంబాబు ఎందుకు ఈ నీరు ఉండిపోయిందని సమీక్ష చేసి ఉంటే, ఈ పంటలు అన్నీ ఎండిపోవు. -కాలవ శ్రీనివాసులు, మాజీమంత్రి