కడప జిల్లా రాయచోటిలోని మాసాపేటలో నివాసం ఉంటున్న రెడ్డి బాషా (35) అనే వ్యక్తి.. తన మేనల్లుడు సిద్దిక్ (10 )ను ద్విచక్ర వాహనం ఎక్కించుకుని తినుబండారాలు కొనిపెట్టేందుకు దుకాణానికి వెళ్లాడు. కడప వైపు నుంచి వస్తున్న కారు ఢీ కొట్టిన ఘటనలో.. రెడ్డి బాషా తీవ్రంగా గాయపడ్డాడు.
ఆస్పత్రికి తరలిస్తుండగా మార్గమధ్యంలోనే చనిపోయాడు. సిద్ధిక్ తీవ్ర గాయాలతో బయటపడగా స్థానికులు రాయచోటి ప్రభుత్వ ఆసుపత్రికి తరలించారు. ప్రథమ చికిత్స అనంతరం పరిస్థితి ఆందోళనకరంగా ఉండటంతో కడప రిమ్స్ కు తరలించారు. ప్రమాదంపై కేసు నమోదు చేసి దర్యాప్తు చేస్తున్నట్లు పోలీసులు పేర్కొన్నారు.