వైఎస్​ఆర్ చిత్రపటం లేదని విద్యార్థుల ఆందోళన

విశ్వవిద్యాలయ వార్షికోత్సవంలో దివంగత నేత వైఎస్ రాజశేఖర్ రెడ్డి చిత్రపటం లేదని విద్యార్థి సంఘాల నాయకులు ఆందోళనకు దిగారు. వేదికపై బైఠాయించి జోహార్ వైఎస్​ఆర్ అంటూ నినాదాలు చేశారు.  చివరికి వైఎస్ఆర్ ఫోటోను అధికారులు ఏర్పాటు చేసినందున విద్యార్థులు శాంతించారు. ఈ ఘటన కడప యోగి వేమన విశ్వవిద్యాలయంలో చోటుచేసుకుంది.

కడప యోగి వేమన విశ్వవిద్యాలయ 9వ వార్షికోత్సవాన్ని పురస్కరించుకుని సమావేశాన్ని నిర్వహించారు. అధికారులు యోగివేమన చిత్రపటాన్ని ఏర్పాటు చేశారు. దాని పక్కనే దివంగత ముఖ్యమంత్రి రాజశేఖర్​రెడ్డి చిత్రపటాన్ని ఎందుకు ఏర్పాటు చేయలేదంటూ విద్యార్థి సంఘ నాయకులు సమావేశం జరుగుతుండగా ఉపకులపతి రామచంద్రారెడ్డి వద్దకు వచ్చి వాగ్వాదానికి దిగారు. వైఎస్​ఆర్ చిత్రపటం ఏర్పాటు చేయాలి అని డిమాండ్ చేస్తూ వేదికపైనే బైఠాయించారు. పోలీసులు నచ్చజెప్పిన వినలేదు. పరిస్థితి ఉద్రిక్తంగా మారినందున.. ఎట్టకేలకు అధికారులు వై.యస్ చిత్రపటం ఏర్పాటు చేసి పూలమాల వేశారు.