ముఖ్యమంత్రి జగన్మోహన్ రెడ్డి విద్యా రంగంపై విశేషమైన దృష్టి పెట్టి, ఉన్నత విద్యా వంతులను తయారుచేసేందుకు కృషిచేస్తున్నారని రాష్ట్ర మంత్రి బాలినేని శ్రీనివాసరెడ్డి అన్నారు. ప్రకాశం జిల్లా ఒంగోలు బంట్లమెట్ట ప్రభుత్వ బాలికల పాఠశాలలో జగనన్న విద్యా కానుక కార్యక్రమాన్ని ఆయన ప్రారంభించారు. గత ప్రభుత్వం ప్రైవేట్ విద్యను ప్రోత్సహించి, ప్రభుత్వ విద్యను నిర్లక్ష్యం చేశారని విమర్శించారు. తమ ప్రభుత్వంలో ప్రతి పేదవాడు ఉన్నత విద్యా వంతుడు కావాలనే ఉద్దేశంతో నాణ్యమైన విద్యను, సకల సౌకర్యాల గల పాఠశాలలను అందుబాటులోకి తీసుకువస్తున్నారన్నారు. పార్లమెంట్‌ సభ్యుడు మాగుంట శ్రీనివాసుల రెడ్డి, కలెక్టర్‌ పోలా భాస్కర్‌ , విద్యాశాఖాధికారులు ఈ కార్యక్రమంలో పాల్గొన్నారు. విద్యార్థులకు విద్యాకానుక కిట్లు పంపిణీచేశారు. విద్యార్థుల సాంస్కృతిక ప్రదర్శనలు ఆకట్టుకున్నాయి.
యర్రగొండపాలెం నియోజకవర్గ వ్యాప్తంగా విద్యాకానుకను ప్రారంభించారు. యర్రగొండపాలెం పట్టణంలోని కస్తూరిబా బాలికల పాఠశాలలో నిర్వహించిన కార్యక్రమంలో స్థానిక వైకాపా నాయకులు విద్యార్థులకు కిట్లు పంపిణీ చేశారు.
రాష్ట్రంలోని ప్రతి విద్యార్థికి కార్పొరేట్ విద్య అందించటమే ప్రభుత్వం లక్ష్యమని చీరాల ఎమ్మెల్యే కరణం బలరామకృష్ణమూర్తి, ఎమ్మెల్సీ పోతుల సునీత అన్నారు. చీరాల మున్సిపల్ ఉన్నతపాఠశాలలో విద్యా కానుక కిట్లు పంపిణీ చేశారు. కార్యక్రమంలో మున్సిపల్ కమిషనర్ కె. రామచంద్రా రెడ్డి గారు, డీఈవో వెంకటేశ్వర్లు, మండల ప్రత్యేక అధికారి బేబీ రాణి తదితరులు పాల్గొన్నారు.