కేవలం 2 వేల రూపాయలకే భూగర్భ జలాల రీఛార్జ్

వాననీటిలోని ప్రతి బొట్టును ఒడిసిపడుతున్నారు కర్నూలుకు చెందిన వ్యక్తి.  కేవలం రెండు వేల రూపాయల ఖర్చుతో ఏడాదంతా నీటి కొరత లేకుండా ఏర్పాట్లు చేసుకున్నారు.

కర్నూలు నగరంలోని డాక్టర్స్ కాలనీకి చెందిన రఘునాథ్ రెడ్డి తన ఇంటిపైన పడే వర్షపు నీటిని ఒడిసిపట్టుకునే ప్రయత్నం చేస్తున్నారు. మిద్దెపై పడే నీటిని పైపుల ద్వారా కింద ఉన్న డ్రమ్ములోకి పంపిస్తున్నారు. ఆ డ్రమ్ముకు దోమల మెష్ బిగించి దుమ్ము ధూళి పడకుండా చేసి.. ఆ నీటిని బోర్ గుంతలోకి పంపిస్తున్నాడు. బోర్ కేసింగ్ పైపుకు ముందుగానే వేసిన రంధ్రం ద్వారా భూమిలోకి నీరు చేరుతుంది. ఈ విధానం ద్వారా వేసవి కాలంలో బోర్లు ఎండిపోవని.... నీటి కొరత ఉండదని రఘునాథ్ రెడ్డి అంటున్నారు. ఇంట్లో బోర్ ఉన్న ప్రతి ఒక్కరూ ఈ విధంగా చేస్తే నగరాన్నింటిలోనూ భూగర్బ జలాలు పెరుగుతాయన్నారు. ఈ విధానానికి 2వేల రూపాయలకు మించి ఖర్చు కాదంటున్నారు. ఈటీవీలో నీటి సంరక్షణపై వచ్చే కార్యక్రమాల స్ఫూర్తితోనే తాను ఈ విధానాన్ని తయారు చేసుకున్నానని ఆయన తెలిపారు.

అదేవిధంగా కర్నూలు నగరంలోని నంద్యాల చెక్ పోస్టు వద్ద ఏర్పాటు చేసిన మినరల్ వాటర్ ప్లాంట్​లోనూ నీటి వృథాను అరికడుతున్నారు రఘనాథ్ రెడ్డి. వాటర్ ప్లాంట్ కోసం 3 బోర్లు త్రవ్వగా అందులో రెండు బోర్లలో నీరు పడలేదు. మూడో బోరు నుంచి నీరు సంవృద్ధిగా వస్తుంది. ప్లాంట్​లో ప్యూరిఫై కాగా వృథాగా వెళ్లే నీటిని బోర్ గుంతలకు పంపుతున్నాడు. దీనివల్ల నీరు పడని బోర్లు కూడా ఉపయోగంలోకి వచ్చాయి. కొంత నీటిని వాటర్ ప్లాంట్​లో ఉన్న మొక్కలకు, చెట్లకు డ్రిప్ ద్వారా అందిస్తున్నారు.

వర్షపు నీటిని వృథాగా పోనివ్వకుండా సద్వినియోగం చేసుకుంటున్న రఘును ఆదర్శంగా తీసుకున్న కొందరు ఈ విధానాన్ని తమ గృహాల్లోనూ ఏర్పాటు చేసుకునేందుకు ముందుకు వస్తున్నారు.