చేపల చెరువుల తవ్వకాలను నిరసిస్తూ.. గుడివాడ ఆర్డీవో కార్యాలయం ఎదుట ధర్నా

కృష్ణా జిల్లా నందివాడ మండలంలో అధికార పార్టీ నేతలు కోట్లాది రూపాయల విలువ చేసే ప్రభుత్వ భూమిలో చేపల చెరువులు తవ్వుతున్నారని.. వ్యవసాయ కార్మిక సంఘం నాయకులు నిరసన చేపట్టారు. ఈ విషయంపై అధికారులకు ఫిర్యాదు చేసినప్పటికీ తమకేమి పట్టనట్లు వ్యవహరిస్తున్నారని ఆందోళన వ్యక్తం చేశారు.

కృష్ణా జిల్లా నందివాడ మండలంలోని పుట్టగుంట గ్రామం బుడమేరు ఎత్తిపోతల పథకం వద్ద వైకాపా నేతలు.. కోట్లాది విలువ చేసే ప్రభుత్వ భూమిలో రొయ్యల చెరువులు తవ్వుతున్నారని ఆరోపిస్తూ.. వ్యవసాయ కార్మిక సంఘాల నేతలు గుడివాడ ఆర్టీవో కార్యాలయం ఎదుట ఆందోళన చేపట్టారు. ఈ వ్యవహారంపై అధికారులకు ఫిర్యాదు చేసినప్పటికీ నిమ్మకు నీరెత్తనట్లు వ్యవహరిస్తున్నారని ఆవేదన వ్యక్తం చేశారు. అసైన్డ్ భూములైనప్పటికీ వందలాది ట్రాక్టర్ల ద్వారా మట్టిని తరలిస్తున్నా అధికారులు చూసీ చూడనట్లు వ్యవహరిస్తున్నారని వారు చెబుతున్నారు. చిన్నపాటి వర్షాలొచ్చినా.. పంట పొలాలు ముంపునకు గురయ్యే ప్రమాదం ఉందని కార్మిక సంఘాల నేత మురాల రాజేశ్ చెప్పారు. గ్రామ సర్పంచ్, మండల జెడ్పీటీసీ అభ్యర్థిని భర్త పర్యవేక్షణలో ఈ తవ్వకాలు జరుగుతున్నట్లు వ్యవసాయ సంఘం నాయకులు ఆరోపిస్తున్నారు.

ప్రస్తుతం ఎటువంటి తవ్వకాలు జరగట్లేదు..

తవ్వకాలు జరుగుతున్న ప్రదేశానికి అధికారులను పంపినట్లు తహసీల్దార్ అబ్దుల్ రెహమాన్ చెప్పారు. ప్రస్తుతం పుట్టగుంటలో ఎటువంటి తవ్వకాలు జరగటం లేదని.. తవ్వకాలు చేపడితే చర్యలు తీసుకుంటామని ఆయన చెప్పారు.

ఇదీ చదవండి:గన్నవరంలో పేకాటరాయుళ్ల మధ్య వివాదం.. పరస్పర దాడి