కొవిడ్ పరీక్షలు చేయించుకోవటమే పెద్ద గండం

కరోనా పరీక్షలు చేయించుకోవటమే పెద్ద సమస్యగా మారుతోంది. కొవిడ్ అనుమానితులు పరీక్షా కేంద్రాల ముందు గంటల కొద్ది వేచి ఉంటున్నారు. విజయవాడ ఇందిరాగాంధీ మున్సిపల్ మైదానం వద్ద ఓ వృద్ధ దంపతులు అనారోగ్యంతో ఆసుపత్రికి వెళ్తే ముందు కొవిడ్ టెస్టులు చేయించుకుని రమ్మని వైద్యులు చెప్పటంతో మైదానం ముందు పడిగాపులు కాస్తున్నారు. అయినా ఎవరూ పట్టించుకోవటం లేదని ఆవేదన వ్యక్తం చేస్తున్నారు.

భార్యకు వారంరోజులుగా జ్వరం. వైద్యం కోసం ఏ ఆసుపత్రికి తీసుకెళ్లినా కరోనా పరీక్షలు చేయించుకొని రావాలంటూ సూచిస్తున్నారు. దీంతో విజయవాడ గవర్నర్‌పేటకు చెందిన వృద్ధుడు జ్వరంతో బాధపడుతున్న తన భార్యను తీసుకుని ఇందిరాగాంధీ మున్సిపల్‌ మైదానానికి కరోనా పరీక్షల కోసం శనివారం తెల్లవారుజామున వచ్చారు. మధ్యాహ్నం 2 గంటలైనా పరీక్షలు చేయకపోవటంతో.. వృద్ధురాలు దగ్గరలో ఉన్న ఓ చెట్టు వద్ద నీరసంతో కూలబడింది. పక్కనే మురికి నీటికుంట ఉన్నా.. జ్వరం, శ్వాస సమస్యతో అక్కడే పడుకుని ఉక్కిరిబిక్కిరి అయింది. త్వరగా పరీక్ష చేయమని సిబ్బందిని బతిమాలినా.. వేచి ఉండమంటూ చెప్పారంటూ ఆ వృద్ధుడు వాపోయాడు.

విజయవాడ నగరంలో కరోనా కేసులు రోజురోజుకు పెరుగుతూనే ఉన్నాయి. కృష్ణా జిల్లాలో నమోదైన పాజిటివ్ కేసుల్లో 80శాతం కేసులు విజయవాడ నగరంలోనే ఉన్నాయి. ఈ పరిస్థితుల్లో పరీక్షా కేంద్రాల వద్ద ఇలా ఉండటం పట్ల స్థానికులు ఆందోళన వ్యక్తం చేస్తున్నారు. వచ్చినవారికి త్వరితగతిన పరీక్షలు చేయాలని కోరుతున్నారు.

ఇదీ చూడండి