జాతర వస్తే... ఆ గ్రామం రంగస్థలమే!

జాతర అంటే డప్పుల మోతలు, నైవేద్యాలు, ఊరేగింపులు ఇలాంటివి గుర్తొస్తాయి. తూర్పు గోదావరి జిల్లాలోని ఓ గ్రామంలో మాత్రం జాతర వస్తే... అందరూ రంగస్థల నటుల్లా మారిపోతారు. పురాణ పురుషుల వేషధారణలతో అలరిస్తారు. నృత్యాలు, పాటలు, డైలాగులు ఇలా తమలోని ప్రతిభను వెలికితీస్తారు. కళారాధనతో అమ్మవారి మొక్కులు తీర్చుకుంటారు

ఓవీధిలోకి వెళితే సీతారామలక్ష్మణులు, వారిని కీర్తిస్తూ వానర వీరులు కనిపిస్తారు. ఈ సందోహాన్నుంచి బయటపడి మరో వీధిలోకి అడుగు పెడితే... గోపికలతో సరసమాడే శ్రీకృష్ణుడి దర్శనమవుతుంది. రామకృష్ణులే కాదు, ఎందరో పురాణ పురుషులు ఆ గ్రామంలో కనిపిస్తారు. నృత్యగాన వాక్ పటిమలతో మైమరపిస్తారు. తూర్పు గోదావరి జిల్లా కోరుకొండ మండలంలోని శ్రీరంగపట్నంలో ఏటా జరిగే మోదుకొండమ్మ తల్లి జాతరి వైభవం ఇది. సుమారు 500 కు పైగా కుటుంబాలు ఉత్సాహంగా ఈ ఉత్సవంలో పాల్గొంటాయి. ప్రతి ఇంటి నుంచి కనీసం ఒక్కరైనా విభిన్న వేషాలతో వేడుకకు తరలివస్తారు.

పురాణ పురుషుల వేషధారణల వెనుక ఓ నేపథ్యం ఉంది. కోరిన కోర్కెలు తీరినవారంతా ఇలా విభిన్న రూపాల్లో కనువిందు చేస్తారు. ఈ పాత్రల్లో రామలక్ష్మణుల వేషధారణ ప్రత్యేకం. అందరూ ఆ వేషాలు ధరించరు. రామలక్ష్మణుల వేషధారణ కోసం 6 నెలల ముందుగానే గ్రామంలో వేలంపాట పెడతారు. ఎవరైతే ఎక్కువ మొత్తానికి పాడుతారో వాళ్లే ఆ ఏడాదికి రామలక్ష్మణులు. మోదుకొండమ్మ జాతర సందర్భంగా ఏటేటా నిర్వహించే ఈ వేడుకలు చూడటానికి, చుట్టుపక్కల ఊళ్ల నుంచి ఉత్సాహంగా ప్రజలు తరలివస్తారు.