'హమ్మయ్యా..చిరుత చిక్కింది'

కోనసీమ ప్రజలను భయాందోళనకు గురిచేసిన చిరుత పులిని అటవీ శాఖ అధికారులు పట్టుకున్నారు.

పది రోజుల పాటు భయం గుప్పిట్లో గడిపిన కోనసీమ ప్రజలు ఊపిరిపీల్చుకున్నారు. ఫిబ్రవరి 4వ తేదీన.. ఆత్రేయ పురం మండలం అంకం పాలెం గ్రామంలో చిరుతపులి ఇద్దరి గ్రామస్థులపై దాడి చేసింది. అప్పటి నుంచి పులిని పట్టుకోవాలనే అటవీశాఖ అధికారుల, ప్రజల ప్రయత్నాలు ఎట్టకేలకు ఫలించాయి.

సరిగ్గా 10 రోజుల తర్వాత ..ఫిబ్రవరి 14న తూర్పుగోదావరి జిల్లా ముమ్మిడివరం మండలం బలుసులంక వాసుల్ని చిరుత మళ్లీ భయపెట్టింది. ఉదయం బహిర్భుమికి వెళ్లిన ఈశ్వరరావు అనే వ్యక్తితో పాటు మరో వ్యక్తిని గాయపరచింది. గ్రామస్థులు వెంబడించడం వలన పక్కనే ఉన్న ఒక పూరి గుడిసెలోకి ప్రవేశించింది.
పోలీసులు, అటవీశాఖ అధికారులకు ఈ సమాచారం తెలుసుకుని గ్రామానికి వచ్చారు. చిరుతను పట్టుకోవాలని అధికారులంతా సమన్వయం చేసుకున్నారు. గుడిసె పైన, చుట్టూ పటిష్ఠమైన వలలు కట్టారు. చిరుత పారిపోయేందుకు ఆస్కారం లేకుండా వలపన్నారు . డాటింగ్ ప్రక్రియ ద్వారా తుపాకీతో మత్తు మందు ఇచ్చేందుకు ప్రయత్నించారు. కానీ దాని ప్రభావం చిరుతకు పనిచేయలేదు. చాలా ప్రయత్నాలు తర్వాత రాత్రి 11 గంటలకు అధికారులు చిరుత పులిని బంధించారు.
ఈ దృశ్యాలను చూసేందుకు చుట్టు ప్రక్కల నుంచి జనం ఎక్కువ సంఖ్యలో వచ్చారు. వీరిని అదుపు చేయడం పోలీసులకు అదనపు శ్రమను కలిగించింది. చిరుతకు ఎలాంటి హాని జరగకుండా అధికారులు విజయవంతంగా పట్టుకున్నారు.