చెత్త నుంచి సంపద తయారీ కేంద్రాన్ని రాష్ట్రంలోనే మొదటిసారిగా చిత్తూరు జిల్లా వి.కోట మేజర్‌ పంచాయతీలో ఏర్పాటు చేశారు. గృహాల నుంచి సేకరించిన చెత్తతో ఎరువులు తయారుచేసి.. అన్నదాతలకు విక్రయించారు. ఫలితంగా పంచాయతీకి అదనపు ఆదాయం సమకూరింది. ఘన వ్యర్థాల నిర్వహణను కూడా ఓ యజ్ఞంలా చేపట్టింది. ఇదే పంచాయతీనే గత ప్రభుత్వం భూగర్భ మురుగునీటి పారుదల వ్యవస్థకు సంబంధించి పైలట్‌ ప్రాజెక్టుగా ఎంపిక చేసింది. 21 కిలోమీటర్ల మేర నిర్మించాలని ప్రణాళికలు రూపొందించగా.. 18 కి.మీ పూర్తయింది. దీంతో పంచాయతీలో దోమల బెడద.. జ్వరాల బారిన పడే వారి సంఖ్యా తగ్గింది. స్వచ్ఛత, వ్యర్థాల నిర్వహణ, మౌలిక సదుపాయాలు కల్పించడంతో 2016-17లో ఈ పంచాయతీకి దీన్‌దయాళ్‌ ఉపాధ్యాయ పంచాయతీ స్వశక్తికరణ్‌ పురస్కారం వరించింది. 2018లో దివంగత మాజీ సర్పంచి రామక్రిష్ణప్ప అప్పటి కేంద్రమంత్రి చేతుల మీదుగా అవార్డు అందుకున్నారు. ఆయన మూడుసార్లు సర్పంచిగా వ్యవహరించారు.
సర్పంచులకు పాఠమైంది..
పెనుమూరు మండలంలోని లక్కలపూడివాండ్లఊరు సాధించిన విజయాలు దేశంలోని ఇతర పంచాయతీ సర్పంచులకు పాఠాలయ్యాయి. అయిదేళ్ల కాలంలో పంచాయతీలో వీధివీధికి సీసీ రహదారులు, తాగునీటి సౌకర్యం, ఆరోగ్య కేంద్రం నిర్మాణం వంటి పనులను చేపట్టారు. 2.65 కోట్ల రూపాయలతో కలికిరి కొండకు మలుపుల వద్ద సీసీ, సాధారణ ప్రాంతంలో తారు రహదారి కూడా వేశారు. ఇందుకోసం అప్పటి సర్పంచి నారా శాంతి కేంద్ర మంత్రులను కలసి.. విన్నవించారు. మొత్తంగా రోడ్డు నిర్మాణం పూర్తి చేశారు. ఈ అభివృద్ధిని మెచ్చి.. 2015-16 సంవత్సరానికి కేంద్రం ఉత్తమ పంచాయతీ పురస్కారాన్ని ప్రకటించింది. గ్రామ అభివృద్ధిని ఓ డాక్యుమెంటరీగా రూపొందించి సర్పంచులకు ఓ నమూనాగా ప్రదర్శిస్తున్నారు.