దీపావళి పర్వదినాన శ్రీకాళహస్తి క్షేత్రాన్ని దర్శించుకొని ఇంటికి తిరిగి వెళ్తున్న భక్తుల కుటుంబాల్లో రోడ్డు ప్రమాదం తీవ్ర విషాదాన్ని మిగిల్చింది. తమిళనాడు రాష్ట్రం గుడియాత్తం ప్రాంతానికి చెందిన ఒక కుటుంబం కారులో చిత్తూరు జిల్లా శ్రీకాళహస్తి క్షేత్రంలో పూజలు నిర్వహించారు. తిరుగు ప్రయాణంలో శ్రీరంగరాజపురం మండలం క్షీర సముద్రం వద్ద తొమ్మిది మందితో వెళ్తున్న కారు అదుపుతప్పి బోల్తాపడింది. ఈ ప్రమాదంలో ఐదుగురికిపైగా గాయపడ్డారు.
స్థానికులు కారులో ఉన్నవారిని రక్షించే ప్రయత్నం చేశారు. క్షతగాత్రులను చికిత్స నిమిత్తం చిత్తూరు ప్రభుత్వ ఆసుపత్రికి తరలించారు. వాళ్లలో లావణ్య అనే మహిళ పరిస్థితి విషమించడం వల్ల ఆస్పత్రికి తరలించే క్రమంలోనే మృతి చెందినట్లు స్థానికులు తెలిపారు. ఘటనా స్థలానికి చేరుకున్న పోలీసులు కేసు నమోదు చేసి విచారణ చేపట్టారు.