సమస్యలు చుట్టుముట్టినా.. ఆ రైతుకు చీకట్లు కమ్ముకోలేదు. చీకటి అవతల ఉన్న.. వెలుతురును చూశాడు. పరిస్థితులు దివ్యాంగుడిని చేసినా... అదేం పెద్ద సమస్య కాదన్నట్టు.. ఒంటి చేత్తో పొలం దున్నుతాడు. తన పనులు తానే చేసుకుంటాడు.. అనంతపురానికి చెందిన ఓ అన్నదాత.
చేయి విరిగింది.. అయినా.. ఒంటి చేత్తో వ్యవసాయం చేస్తాడు
అనంతపురం జిల్లా విడపనకల్లు మండలం డొనేకల్లుకు చెందిన రైతు నబీరసూల్ ఒంటిచేత్తో పొలం దున్నుతాడు. అంగవైకల్యంలోనే అవకాశాన్ని సృష్టించుకున్నాడు. రసూల్ జీవితంలో అన్ని సక్రమంగా జరుగుతున్న సమయంలో ఓ ప్రమాదం జరిగింది. తనకు జీవనోపాధినిచ్చే.. పిండి మిషన్లో అనుకోకుండా తన కుడిచేయి ఇరుక్కుని.. తెగిపోయింది. అయినా కుంగిపోలేదు. ఒక్క చేయితోనే అద్భుతంగా వ్యవసాయం చేస్తున్నాడు. అన్ని పనులు తానే చేసుకుంటున్నాడు.