ధోనీ..దేశభక్తి !

దేశమంటే విపరీతమైన ప్రేమ చూపించే భారత క్రికెటర్ ధోనీ జాతీయ జెండాపై తన గౌరవం చూపి మరోసారి దేశభక్తిని చాటాడు. విదేశీ గడ్డపై జరుగుతోన్న మ్యాచ్​లో ఓ అభిమాని చేతుల్లో పతాకం నేలను తాకబోతుండగా పట్టుకున్నాడు. దీనిపై అభిమానులు ప్రశంసలు కురిపిస్తున్నారు.

భారత సీనియర్​ క్రికెటర్​ మహేంద్రసింగ్ ధోనీ మైదానంలో చాలా సమయస్ఫూర్తితో వ్యవహరిస్తుంటాడు. కనురెప్పలు పడేలోపే వికెట్లు పడగొడుతుంటాడు. ప్రత్యర్థి కదలికల్ని నిశితంగా పరిశీలిస్తుంటాడు మిస్టర్​ కూల్​. తాజాగా హామిల్టన్​లో కివీస్​తో ఆఖరి టీ20 మ్యాచ్‌లోనూ ఓపెనర్ సీఫర్ట్‌ని స్టంపౌట్ చేయడం ఇలానే సంచలనమైంది. అలాంటి ధోని జాతీయ జెండా కింద పడిపోతుంటే అంతే అప్రమత్తంగా దాన్ని చేతిలోకి తీసుకున్నాడు.

• ఏం జరిగింది..?

మ్యాచ్‌లో టీమిండియా బౌలింగ్ చేస్తుండగా ..జాతీయ జెండాని చేతిలో పట్టుకుని ఓ భారత అభిమాని మైదానంలోకి ప్రవేశించాడు. నేరుగా ధోనీ దగ్గరికొచ్చిన అభిమాని భావోద్వేగంతో కాళ్ల మీద పడిపోయాడు. వెంటనే అతని చేతిలోని జెండా నేలని తాకబోతుండటాన్ని గమనించిన ధోని.. స్పందించి అభిమాని చేతుల్లోంచి ఆ జెండాని తన చేతుల్లోకి తీసుకున్నాడు. అతడ్ని వెళ్లిపోవాల్సిందిగా సూచించాడు. ఆ తర్వాత జెండాని భద్రతా సిబ్బందికి అప్పగించాడు.

• భారత ఆర్మీలో లెఫ్టినెంట్ కల్నల్ (గౌరవ) హోదాలో ఉన్న ధోనీ మరోసారి దేశభక్తిని చాటుకున్నాడు.