పసుపు దళానికి ఎర్రదండు అండ

ఫ్రాన్స్​ పసుపు జాకెట్​ ఆందోళనకారులకు కమ్యూనిస్టు యూనియన్లు జతకట్టాయి. అధ్యక్షుడు మేక్రాన్​కు వ్యతిరేకంగా మంగళవారం నిరసనలు చేపట్టాయి.

ఫ్రాన్స్​ అధ్యక్షుడు ఇమ్మాన్యుయెల్​ మేక్రాన్​కు వ్యతిరేకంగా పసుపు జాకెట్​ ఉద్యమకారులు చేపట్టిన నిరసనలకు మరింత బలం చేకూరింది. సుమారు మూడు నెలల క్రితం ప్రారంభమైన ఈ ఉద్యమానికి దూరంగా ఉన్న అక్కడి కమ్యూనిస్ట్​ యూనియన్లు తాజాగా వారితో జతకట్టాయి. మొదటి సారి పసుపు జాకెట్​ ఉద్యమకారులతో కలిసి నిరసన ర్యాలీలో పాల్గొన్నాయి యూనియన్లు.

కమ్యూనిస్ట్​ ఆధారిత సీజీటీ యూనియన్​ మంగళవారం సిటీ హాల్​ నుంచి ప్లేస్​ డి లా కాంకోర్డే వరకు ర్యాలీలో పాల్గొని నిరసన తెలిపింది.

" ఇరువురి మధ్య ఉన్న సాధారణ డిమాండ్లను నెరవేర్చటం అవసరం. ఇప్పుడు మేము వారితో ఉన్నాం. వారితో కలవకపోవడానికి మాకు ఎలాంటి కారణం కనిపించడం లేదు. సంయుక్తంగా నిర్వహించిన మొదటి ర్యాలీ విజయవంతమైంది. మొదటగా సరికొత్త కార్యక్రమాలతో రావటం అవసరం. ఈ రోజు చాలా మద్దతు లభించింది. మాతో చాలా మంది ఉన్నారు. కానీ ఇంకా ఎక్కువ మంది అవసరం. మంగళవారాల్లో కొత్త కొత్త ప్రయత్నాలతో పోరాటం చేస్తామని హామీ ఇస్తున్నా. "

- ఫిలిప్​ మార్టినెజ్​, సీజీటీ యూనియన్​ ముఖ్య కార్యదర్శి

మంగళవారం నిర్వహించిన నిరసనల్లో పలు సార్లు బాష్పవాయువు ప్రయోగించారు పోలీసులు. ఆందోళనకారులను చెదరగొట్టారు. అయిననప్పటికీ మూడు నెలలుగా జరుగుతున్న వారాంతపు పసుపు జాకెట్​ నిరసనలతో పోల్చితే మంగళవారం జరిగిన ఆందోళన ప్రభావం తక్కువగానే ఉంది.