మిలన్​ - 2020 నేవీ ఉత్సవానికి విశాఖలో భారీగా ఏర్పాట్లు

విశాఖ భారీ ఉత్సవానికి సిద్ధమవుతోంది. వివిధ దేశాల నౌకాదళాల మధ్య పరస్పర సహకారంలో భాగంగా జరిగే మిలన్ - 2020 కోసం... తూర్పునౌకాదళం విస్తృత స్ధాయిలో ఏర్పాట్లు చేస్తోంది. వివిధ దేశాల నౌకలకు ఆతిథ్యమిచ్చేందుకు రంగం సిద్ధం చేస్తోంది. దాదాపు 50కి పైగా యుద్ద నౌకలు ఇందులో పాల్గొననున్నాయి.

తూర్పు తీరంలో మరో భారీ నేవీ ఉత్సవం జరగనుంది. మార్చి నెలలో మిలన్ - 2020 పేరిట అంతర్జాతీయ నేవీ ఉత్సవానికి విశాఖ ఆతిథ్యమివ్వనుంది. తూర్పు నౌకాదళం ఇందుకోసం భారీ ఏర్పాట్లు చేస్తోంది. 2016లో ఇంటర్నేషనల్ ఫ్లీట్ రివ్యూ(ఐఎఫ్​ఆర్) నిర్వహించిన అనుభవంతో.... మిలన్ - 2020 నిర్వహిస్తోంది. సరిగ్గా నాలుగేళ్ల తర్వాత మళ్లీ వివిధ దేశాల నుంచి యుద్ధ నౌకలు విశాఖ తీరానికి రానున్నాయి. ఇప్పటికే 41 దేశాలకు అహ్వానాలు పంపగా 30 దేశాలు మిలన్ 2020లో పాల్గొంటున్నట్లు ధ్రువీకరించాయి. విదేశీ నౌకా దళాల్లో ఒక్కో దేశం నుంచి రెండు, మూడు నౌకలు వచ్చే అవకాశం ఉంది.

సాగరతీరం మరింత సుందరంగా

మార్చి నెలలో జరిగే ఈ మెగా ఉత్సవం కోసం సాగరతీరం ముస్తాబు కానుంది. ఇప్పటికే స్వచ్ఛ సర్వేక్షణ్ కోసం సిద్ధమవుతున్న విశాఖలో.... ఈ ఉత్సవం ద్వారా బీచ్​రోడ్​ను మరింత సుందరంగా తీర్చిదిద్దనున్నారు. విశాఖ మహా నగర పాలక సంస్థ కమిషనర్, పోలీసు కమిషనర్ సహా వీఎంఆర్డీఏ, పోర్టు ట్రస్ట్, హెచ్​పీసీఎల్, ఐఓసీ, వంటి సంస్థలతో తూర్పునౌకాదళం చీఫ్ ఆఫ్ స్టాఫ్ వైస్ అడ్మిరల్ ఎస్​.ఎన్ ఘోర్మడే ప్రత్యేకంగా సమీక్షించారు. వారి నుంచి అవసరమైన సహకారాన్ని కోరారు.

రెండు దశల్లో

మార్చి 18 నుంచి ఆరంభమయ్యే ఈ సంయుక్త విన్యాసాలు హార్బర్ దశ, సముద్రపు దశ రెండు భాగాలుగా జరగనున్నాయి. మార్చి 18 నుంచి ఈ విన్యాసాలకు వచ్చే విదేశీ యుద్ద నౌకలకు సంప్రదాయంగా స్వాగతం పలుకుతారు. మిలన్ 2020 కోసం నిర్మించిన గ్రామాన్నిమార్చి 19న ప్రారంభిస్తారు. 20న ఈ ఉత్సవం ఆరంభ వేడుక నిర్వహిస్తారు. ఇందులో సదస్సులూ నిర్వహిస్తారు. 21, 22 తేదీల్లో బౌద్ద గయ, తాజ్ మహల్ పర్యటనలు ఉంటాయి. 23 నుంచి సీఫేజ్ కోసం యుద్ద నౌకల తరలింపు ఉంటుంది. 24,25 లలో ప్రాధమిక విన్యాసాలు ఉంటాయి. 26న అడ్వాన్స్డ్ విన్యాసాలు నిర్వహిస్తారు. మార్చి 27న మిలన్ 2020 ముగింపు ఉత్సవం ఉంటుంది.

ఇదీ చదవండి: