సంగీతం, బ్యాండ్‌ దేశానికి గుండె చప్పుడులాంటివి: తెలంగాణ గవర్నర్

తెలంగాణలోని సికింద్రాబాద్‌ రైల్వే క్రీడల మైదానంలో అఖిల భారత పోలీసు బ్యాండ్‌ పోటీలను గవర్నర్ తమిళిసై సౌందరరాజన్​ ప్రారంభించారు. సంగీతం, బ్యాండ్‌ ఈ రెండు దేశానికి గుండె చప్పుడు లాంటివని పేర్కొన్నారు. జీవితంలో సంగీతం అంతర్భాగమని, వీనుల విందైన సంగీతం వినడం ద్వారా ఒత్తిడిని అధిగమించవచ్చని గవర్నర్‌ చెప్పారు.

అఖిల భారత 20వ పోలీసు బ్యాండ్‌ పోటీలకు తెలంగాణలోని సికింద్రాబాద్‌ వేదికైంది. ఈ కార్యక్రమానికి హాజరైన గవర్నర్‌ తమిళిసై సౌందరరాజన్‌... పోటీలను ప్రారంభించారు. దేశవ్యాప్తంగా 22 రాష్ట్రాలకు చెందిన పోలీసు బ్యాండ్‌ సిబ్బంది ఈ పోటీల్లో పాల్గొంటున్నారు. అసోం, ఆంధ్రప్రదేశ్‌, తమిళనాడు, కేరళ, ఝార్ఖండ్‌, కర్ణాటక, మధ్యప్రదేశ్‌, మహారాష్ట్ర, నాగాలాండ్‌, పంజాబ్‌, ఒడిశా, రాజస్థాన్​ రాష్ట్రాలతో పాటు సీఆర్పీఎఫ్‌, ఐటీబీపీ, ఆర్పీఎఫ్ విభాగాలు పోటీల్లో పాల్గొంటున్నాయి.

పోలీసు బ్యాండ్‌ సిబ్బంది కీలకమైన విధులు నిర్వర్తిస్తున్నారని రాష్ట్ర గవర్నర్‌ తమిళిసై సౌందరరాజన్‌ అన్నారు. ఈ తరహా పోటీల ద్వారా పోలీసు సిబ్బంది ప్రతిభాపాటవాలు వెలికితీయవచ్చని గవర్నర్‌ అభిప్రాయపడ్డారు. మూడు రోజుల పాటు జరిగే ఈ పోటీల్లో 22 రాష్ట్రాల నుంచి 1300 మందికి పైగా సిబ్బంది పాల్గొన్నారు. ఈ నెల 23న జరగనున్న ముగింపు కార్యక్రమానికి ఉపరాష్ట్రపతి వెంకయ్యనాయుడు, రైల్వే శాఖ సహాయ మంత్రి సురేష్‌ సి అంగాడి హాజరుకానున్నారు.

ఇవీ చూడండి: