ఏఆర్​ కానిస్టేబుల్​ ప్రకాశ్​ ఘటనపై సీబీఐ విచారణ జరిపించాలి.. సీఎంకు చంద్రబాబు లేఖ

CBN LETTER TO JAGAN : ఏఆర్​ కానిస్టేబుల్‌​ ఘటనపై విచారణ జరిపించాలని కోరుతూ ముఖ్యమంత్రికి తెలుగుదేశం అధినేత చంద్రబాబు లేఖ రాశారు. ఈ ఘటనపై జ్యుడీషియల్‌, సీబీఐ విచారణ జరిపించాలని లేఖలో కోరారు. బకాయిలు కోరారని తప్పుడు కేసులో ఇరికించి డిస్మిస్‌ చేశారని ఆగ్రహించారు. నిందితులైన అధికారులు ఉన్నత స్థానాల్లో ఉన్నారు కాబట్టి.. కేసు దర్యాప్తును తీవ్రంగా ప్రభావితం చేసే అవకాశం ఉందని వ్యాఖ్యానించారు. విచారణ పూర్తయ్యేవరకు అధికారులను వీఆర్‌లో ఉంచాలని లేఖలో పేర్కొన్నారు. ప్రశ్నించిన వారిని వేధించడం, బెదిరించడం సాధారణమైందని చంద్రబాబు మండిపడ్డారు.

CBN LETTER TO CM JAGAN : అనంతపురం జిల్లాలో ఏఆర్​ కానిస్టేబుల్ ప్రకాశ్‌ను సర్వీస్ నుంచి తొలగించడంపై న్యాయవిచారణ జరిపించాలని సీఎం జగన్‌కు తెదేపా అధినేత చంద్రబాబు లేఖ రాశారు. తనను అక్రమంగా డిస్మిస్‌ చేశారన్న కానిస్టేబుల్ ప్రకాశ్‌ ఫిర్యాదుపైనా సీబీఐతో విచారణ జరిపించాలని లేఖలో విజ్ఞప్తి చేశారు. దళిత ఉద్యోగిని అక్రమ కేసులో ఇరికించారని చంద్రబాబు మండిపడ్డారు. దళిత, బడుగు వర్గాల వారిపై కక్షపూరితంగా వ్యవహరిస్తున్న ఘటనలు ప్రతి రోజూ వెలుగు చూస్తుండడం బాధాకరమని లేఖలో పేర్కొన్నారు. ఏఆర్‌ కానిస్టేబుల్‌ ప్రకాష్‌ ఫిర్యాదులో నిందితులుగా ఉన్న ముగ్గురు అధికారులు ప్రస్తుతం అదే జిల్లాలో కీలకమైన స్థానాల్లో ఉన్నందున విచారణను తీవ్రంగా ప్రభావితం చేసే ప్రమాదం ఉందన్నారు.

విచారణ పూర్తయ్యే వరకు ఆ ముగ్గురు అధికారులను వీఆర్‌లో ఉంచాలని చంద్రబాబు సూచించారు. ఐపీఎస్‌ స్థాయి అధికారులు ముద్దాయిలుగా ఉన్న ఈ కేసులో నిష్పాక్షికమైన దర్యాప్తు జరగాల్సి ఉందని స్పష్టం చేశారు. ఉద్యోగులకు రావాల్సిన బకాయిల విడుదల కోరినందుకు ప్రకాశ్‌ను.. సంబంధం లేని కేసులో ఇరికించి సర్వీస్‌ నుంచి డిస్మిస్‌ చేశారని చంద్రబాబు మండిపడ్డారు.

బాధితురాలిగా చెబుతున్న మహిళే మీడియా ముందుకు వచ్చి.. తప్పుడు కేసు నమోదు చేశారని చెప్పిందని గుర్తు చేశారు. ప్రభుత్వాన్ని ప్రశ్నించారనే కారణంగానే ప్రకాష్‌ పై కక్షగట్టి విధుల నుంచి తొలగించారని స్పష్టమౌతోందన్న చంద్రబాబు.. ప్రశ్నించిన వారిని వేధించడం, హింసించడం, బెదిరించడం సాధారణంగా మారిపోయిందని ఆగ్రహం వ్యక్తం చేశారు.

Case enquiry: అనంతపురం జిల్లా ఎస్పీ ఫకీరప్పతో పాటు పలువురు అధికారులపై నమోదైన కేసు విచారణ ప్రారంభమైంది. విచారణ అధికారిగా పలమనేరు ఎస్.డీపీఓ గంగయ్యను నియమించారు. విచారణ ప్రారంభించిన ఆయన..అధికారులపై చేసిన ఆరోపణలకు సంబం‍ధించిన వివరాలు ఇవ్వాలని కానిస్టేబుల్ భాను ప్రకాష్‌కి నోటీసులు జారీ చేశారు. ఆయన ఇంట్లో లేకపోవడంతో ఇంటికి నోటీసులు అంటించినట్లు తెలిపారు. ఆయన ఫోన్‌కి ఎస్ఎంఎస్, వాట్సాప్ ద్వారా మెసేజ్ ఇచ్చామని..ఎలాంటి స్పందన లేదని గంగయ్య చెప్పారు. తగిన వివరాలు అందిస్తే విచారణ త్వరితగతిన పూర్తి చేస్తామని తెలిపారు.

ఇవీ చదవండి: