తిరుమల శ్రీవారిని దర్శించుకొనే వారి సంఖ్య క్రమంగా పెరుగుతోంది. అన్లాక్ 5.O నేపథ్యంలో శ్రీవారిని దర్శించుకొనేందుకు మరింత మందికి అవకాశం కల్పిస్తూ తితిదే చర్యలు చేపడుతోంది. ప్రత్యేక ప్రవేశం, సర్వదర్శనం, సుపథం, శ్రీవాని ట్రస్ట్‌ ఇలా వివిధ మార్గాల్లో శ్రీవారిని దర్శించుకొనేందుకు తితిదే వీలు కల్పిస్తోంది. దీంతో శ్రీవారిని దర్శించుకొనే వారిసంఖ్య దాదాపుగా పాతికవేలకు చేరింది.
లాక్‌డౌన్‌ సడలింపుల తర్వాత రోజుకు ఆరు వేల మందితో దర్శనాలు ప్రారంభించిన తితిదే.. క్రమంగా సంఖ్య పెంచుతూ పాతికవేలకు చేర్చింది. దీంతో కరోనా ప్రభావంతో మార్చి నుంచి జూన్‌ వరకు దాదాపు మూడు నెలల పాటు నిర్మానుష్యంగా ఉన్న తిరుమల ఇపుడు భక్తజన సంచారంతో సాధారణ పరిస్థితికి చేరుకుంటోంది.
అధిక మాసం రావడంతో ఈ ఏడాది రెండు బ్రహ్మోత్సవాలు నిర్వహించిన తితిదే ఉత్సవాలు ముగియడంతో... నవంబర్‌ నెల నుంచి దర్శనాల కోటాను భారీగా పెందించింది. నవంబర్‌ నెలకు సంబంధించిన ప్రత్యేక ప్రవేశ దర్శన టిక్కెట్ల కోటాను విడుదల చేసిన దేవస్థానం... రోజుకు 19 వేల టికెట్లను అందుబాటులో ఉంచింది. నవంబర్‌ నెలలో ఐదు లక్షల డెబ్బైవేల టికెట్లను ఆన్‌లైన్‌లో అందుబాటులో ఉంచగా మూడు రోజుల్లోనే నాలుగు లక్షలా తొంబైమూడు వేల టికెట్లను భక్తులు కొనుగోలు చేశారు.