తిరుపతి పద్మావతి మహిళా వర్సిటీ 18వ స్నాతకోత్సవం ఇవాళ జరగనుంది. వర్చువల్‌గా పాల్గొననున్న గవర్నర్ బిశ్వభూషణ్.. కులపతి హోదాలో ప్రసంగిస్తారు. ఈ వేడుకలో ప్రముఖ రచయిత్రి ఓల్గా (పోవూరి లలితకుమారి)కు, అమెరికాకు చెందిన ఎన్‌ఆర్‌ఐ మీనాక్షిలకు డాక్టరేట్ ప్రదానం చేయనున్నారు. ఎంఫిల్, పీజీ, యూజీ కోర్సులు పూర్తి చేసిన విద్యార్థులకు పట్టాలు అందించనున్నారు.
ఎన్టీఆర్ ఆలోచనలకు ప్రతిరూపం..
మహిళలను ఉన్నత విద్యావంతులను చేయాలనే ఆశయంతో తిరుపతిలో శ్రీ పద్మావతి మహిళా విశ్వవిద్యాలయాన్ని ప్రారంభించారు. అప్పటి ముఖ్యమంత్రి ఎన్టీ రామారావు ఆలోచనకు ప్రతిరూపంగా 1983 ఏప్రిల్‌ 14న విశ్వవిద్యాలయం పురుడుపోసుకుంది. 138.43 ఎకరాల స్థలంలో రెండు పీజీ కోర్సులు, 4 పీజీ డిప్లొమా, ఒక అండర్‌ గ్రాడ్యుయేట్‌ కోర్సు, రెండు సర్టిఫికెట్‌ కోర్సులతో 300 మంది విద్యార్థినులు, 10 మంది అధ్యాపక సిబ్బందితో వర్సిటీ ప్రారంభమైంది. నేడు 59 కోర్సులు, 5600కు పైగా విద్యార్థినులు, 105 మంది శాశ్వత అధ్యాపకులు, 150 మంది అకడమిక్‌ కన్సల్టెంట్లు, 500 మంది బోధనేతర సిబ్బందితో అలరారుతూ దక్షిణ భారత దేశంలోనే మొదటి మహిళా వర్సిటీగా ఖ్యాతి గడిస్తోంది. వేలాది మంది విద్యార్థినులకు ఉన్నత విద్యను అందించి వారి భవిష్యత్తుకు బాటలు వేస్తోంది. ఎంతో మందిని మేధావులుగా తీర్చిదిద్దిన వర్సిటీ 38 వసంతాలు పూర్తి చేసుకుంది. మేధావులకు గౌరవ డాక్టరేట్లు, పరిశోధనలు పూర్తి చేసుకున్న పరిశోధకులకు డాక్టరేట్ డిగ్రీ పట్టాలు, అత్యుత్తమ మార్కులు సాధించిన విద్యార్థినులకు బంగారు పతకాలు ప్రదానం చేయడానికి, కోర్సులు పూర్తి చేసుకున్న వారికి డిగ్రీలు అందించేందుకు బుధవారం మహిళా వర్సిటీ 18వ స్నాతకోత్సవాన్ని ఉత్సవంలా నిర్వహించేందుకు సన్నద్ధమైంది.
ప్రత్యేక కేంద్రాలు
వృత్తి విద్యాకోర్సులే కాదు ఫుల్‌టైం, పార్ట్‌టైం కోర్సులు అందిస్తూ విద్యార్థినుల ఉపాధికి మార్గం చూపుతోంది. విద్యార్థినుల్లో నైపుణ్యాలను పెంచేందుకు స్కిల్‌ డెవలప్‌మెంట్‌ సెంటర్‌, ప్లేస్‌మెంట్‌ సెల్‌, డీఎన్‌ఏ బార్‌కోడింగ్‌ సెంటర్‌, సెంటర్‌ ఫర్‌ ఎక్సలెన్స్‌, టీవోటీ, సెంటర్‌ ఫర్‌ ఉమెన్‌ స్టడీస్‌, యంగ్‌లైవ్స్‌, ఎంటర్‌ ప్రెన్యూర్‌షిప్‌ సెల్‌, రీసెర్చ్‌ ట్రాన్స్‌లేషన్‌ సెంటర్‌ వంటి పలు కేంద్రాలతో పాటు ఔత్సాహిక పారిశ్రామికవేత్తలను, వారి ఆలోచనలకు కార్యరూపం ఇచ్చేందుకు టీబీఐ, ఉమెన్‌ బయోటెక్‌ వంటి ఎన్నో ప్రత్యేకతలు మహిళా వర్సిటీ సొంతం.