భారత్ బయోటెక్ ఇంటర్నేషనల్‌ అభివృద్ధి చేసి, తయారుచేస్తున్న 'కొవాగ్జిన్' టీకాకు ప్రపంచ ఆరోగ్యసంస్థ (డబ్ల్యూహెచ్‌ఓ) నుంచి అత్యవసర వినియోగ అనుమతి (ఎమెర్జెన్సీ యూజ్‌ లిస్టింగ్‌- ఈయూఎల్‌) సంపాదించే దిశగా కీలక ముందడుగు పడింది. ఈ విషయంలో భారత్ బయోటెక్ ఇంటర్నేషనల్‌ దాఖలుచేసిన ఆసక్తి వ్యక్తీకరణను (ఈఓఐ) ప్రపంచ ఆరోగ్యసంస్థ ఆమోదించింది. ఈ నెల 23న ప్రీ-సబ్‌మిషన్‌ సమావేశాన్ని ఖరారుచేసింది.
టీకా నాణ్యత, సామర్థ్యం, వినియోగించిన టెక్నాలజీ.. తదితర అంశాలను ఈ సమావేశంలో డబ్ల్యూహెచ్‌ఓకు భారత్ బయోటెక్ ప్రతినిధులు వివరించే అవకాశం లభిస్తుంది. ఆరోగ్య అత్యవసర పరిస్థితుల్లో నూతన లేదా లైసెన్సు లేని ఔషధాలు/ టీకాలను ఒక క్రమపద్ధతిలో వినియోగించడానికి ఈయూఎల్‌ నిబంధనలను డబ్ల్యూహెచ్‌ఓ తీసుకొచ్చింది. దీనికింద ‘కొవాగ్జిన్’ టీకాకు అనుమతి పొందడానికి ఇప్పటికే భారత్ బయోటెక్ ఇంటర్నేషనల్‌ తగిన సమాచారాన్ని అందించింది.