పేద, మధ్య తరగతులపై ధరల భారం

ఇంటి ఖర్చు తడిసిమోపెడవుతోంది. అటు పెట్రోలు, డీజిల్‌, వంటగ్యాస్‌.. ఇటు నిత్యావసరాల ధరలు పరుగులు తీస్తున్నాయి. వంట నూనెలైతే భగ్గుమంటున్నాయి. గత ఏడాదితో పోలిస్తే.. లీటరు సన్‌ఫ్లవర్‌ ఆయిల్‌ ఏకంగా 67% పెరిగింది. మునుపెన్నడూ లేని విధంగా పామాయిల్‌ ధర రూ.120 అయింది. వేరుసెనగ నూనె చుక్కలకేసి చూస్తూ.. రూ.165కి చేరింది. ప్రధానమైన పప్పుధాన్యాల్లో సెనగ మినహా మిగిలినవన్నీ 30% వరకు పెరిగాయి. కొన్నిరకాల సబ్బుల ధరలూ పెరిగాయి. కరోనాతో ఆదాయం అసలే అంతంతమాత్రంగా ఉందంటే.. ఇంటి ఖర్చులు సగటున 35% వరకు పెరిగాయి.

ఏడాది క్రితంతో పోలిస్తే.. మధ్యతరగతి కుటుంబంపై పప్పులు, వంట నూనెల రూపంలోనే నెలకు రూ.250 వరకు భారం పడుతోంది. సగటున నెలకు 3 లీటర్ల నూనె వినియోగించే కుటుంబానికి గతంలో రూ.311 వరకు అయ్యేది. ఇప్పుడదే రూ.450 అవుతోంది. అంటే సగటున రూ.140 వరకు పెరిగింది. 2018 మార్చితో పోలిస్తే.. పామాయిల్‌ ధర 97%, వేరుసెనగ, సన్‌ఫ్లవర్‌ నూనెల రేట్లు 67% ఎగబాకాయి. నాలుగు రకాల పప్పులు కిలో చొప్పున తీసుకుంటే అప్పట్లో రూ.375 ఉంటే.. ఇప్పుడవి రూ.445 అయ్యాయి. మూడేళ్ల క్రితంతో పోలిస్తే వీటి ధరలూ 30-78% మేర పెరిగాయి. ఎగుమతుల డిమాండుతో వేరుసెనగ ధరలు చుక్కలనంటుతున్నాయి.

వేరుసెనగల ధర సగటున కిలో రూ.150 వరకు పలుకుతోంది. చింతపండు కిలో ధర గతేడాది రూ.168 ఉండగా.. ఇప్పుడు రూ.240 వరకు చేరింది. కొత్త పండు మార్కెట్‌లోకి వస్తున్నా.. కిలోకు రూ.70 వరకు పెరగడం గమనార్హం. సజ్జలు, ఎర్ర జొన్నల ధరలు కిలో రూ.50-60 మధ్యకు చేరాయి.

*దుస్తులు ఉతకడానికి ఉపయోగించే డిటర్జెంట్‌, లిక్విడ్‌ ధరలూ కిలో/లీటరుకు రూ.20 వరకు పెరిగాయి. యాలకులు, లవంగాలు తదితర సుగంధ ద్రవ్యాల ధరల్లోనూ పెరుగుదల కనిపిస్తోంది.

*మొన్నటి వరకు కిలో రూ.50పైగా పలికిన ఉల్లి.. మెల్లిగా దిగి వస్తోంది. కిలో రూ.30-35 అయింది. వెల్లుల్లి కిలో రూ.100కు చేరింది. కూరగాయల రేట్లు మాత్రం నిరుటి మార్చితో పోలిస్తే.. కాస్త ఊరటనిస్తున్నాయి.

మధ్యతరగతికి మోయలేని భారమే

సగటున చూస్తే.. వివిధ రకాల ఖర్చులు.. ఏడాదిలో 35% మేర పెరిగాయి. నిత్యావసరాలు, పెట్రోలు, వంటగ్యాస్‌ ఇతరత్ర ఖర్చుల రూపంలో ఒక్కో మధ్యతరగతి కుటుంబంపై నెలకు రూ.1,663 వరకు అదనపు భారం పడుతోంది. ఇందులో ఇంటి సరకులే సగటున రూ.700 వరకు పెరిగాయి.

టీ పొడుల నుంచి సబ్బుల వరకు

*ఏడాదికాలంలో బ్రాండెడ్‌ టీపొడి ధర కిలోకు రూ.150-200 వరకు పెరిగింది.
*ముఖ సౌందర్యానికి ఉపయోగించే లేపనం ధర (50 గ్రాములు) 2018 సంవత్సరంలో రూ.88 ఉంటే.. ఇప్పుడది రూ.102 అయింది.
*వంట గిన్నెలు కడగడానికి వాడే 700 గ్రాముల సబ్బు ధర.. రెండేళ్లలో రూ.10 పెరిగింది.
*పసుపు, కారంపొడి ధరలు గతంతో పోలిస్తే.. 20-30% వరకు వరకు అధికంగా ఉన్నాయి. కిలో కారంపొడి రూ.280-300 వరకు ఉంది. గోధుమపిండి గతంలో కిలో రూ.30కి వచ్చేది. ఇప్పుడది రూ.45పైనే అయింది. బ్రాండెడ్‌ కంపెనీలకు చెందినదైదే ఇంకా ఎక్కువే చెల్లించాలి.

*మొబైల్‌ బిల్లులు భారమూ అదనంగా వచ్చి చేరింది. అంతర్జాల సౌకర్యం ఉండే ఫోన్లకు డేటా కోసం అధికంగా చెల్లించాల్సి వస్తోంది. ఎంత తక్కువగా వేసుకున్నా.. ఒక్కో మొబైల్‌కు నెలకు రూ.150 వరకు అవుతోంది. ఇంట్లో ఇద్దరికి ఇలాంటి సౌకర్యం ఉన్నా.. కనీసం రూ.300 వెచ్చించాల్సిందే. గతంతో పోలిస్తే ఇదీ 50% మేర పెరిగింది.

ఇదీ చదవండి: