ఆగస్టు 26న 15 లక్షలకుపైగా ఇళ్ల నిర్మాణ పనులు ప్రారంభం

పేదలందరికీ ఇళ్లు కార్యక్రమంలో భాగంగా ఆగస్టు 26న 15 లక్షలకు పైగా ఇళ్ల నిర్మాణ పనులను రాష్ట్ర ప్రభుత్వం ప్రారంభించనుంది. నాలుగేళ్లలో 27 లక్షల ఇళ్లను నిర్మించనున్నట్లు సీఎం జగన్ ప్రకటించారు.

మొదటి విడత పట్టణాలు, నగరాల్లో..

పేదలందరికీ ఇళ్లు కార్యక్రమంలో భాగంగా ఆగస్టు 26న 15,03,801 ఇళ్ల నిర్మాణ పనులను ప్రభుత్వం ప్రారంభించనుంది. ఈ పథకం కింద రానున్న నాలుగేళ్లలో 27 లక్షల ఇళ్లను నిర్మించనున్నట్లు ముఖ్యమంత్రి జగన్‌మోహన్‌రెడ్డి ప్రకటించారు. ఇందులో భాగంగా మొదటి విడత నిర్మించే 15 లక్షల ఇళ్లపై అధికారులు కసరత్తు పూర్తి చేశారు. వీటిని లబ్ధిదారే ఇల్లు నిర్మించే (బీఎల్‌సీ) పథకం కింద పురపాలక సంఘాలు, పట్టణాభివృద్ధి సంస్థ(యూడీఏ)ల్లో కడతారు. కేంద్ర, రాష్ట్ర ప్రభుత్వాలు ఆర్థిక చేయూతనిస్తాయి. ఒక్కో ఇంటికి కేంద్రం రూ.లక్షన్నర సాయం అందిస్తుంది. రాష్ట్ర ప్రభుత్వమిచ్చే రాయితీపై స్పష్టత రావాల్సి ఉంది.

ఒక్కో చోట 10 నుంచి 10 వేల వరకు ఇళ్లు
ప్రభుత్వం ఉచితంగా స్థలమిచ్చి ఇల్లు మంజూరు చేస్తామని ప్రకటించింది. దీనికి అనుగుణంగా రెవెన్యూ అధికారులు స్థలాలను ఎంపిక చేస్తారు. వీటిలో న్యాయపరమైన ఇబ్బందులు లేనివి, ఇళ్ల నిర్మాణానికి విద్యుత్‌, నీటి సౌకర్యం అందుబాటులో ఉన్న స్థలాలను మొదటి విడత ఇళ్ల నిర్మాణాలకు ఎంపిక చేశారు. ఒక్కో చోట 10 నుంచి 10 వేల వరకు ఇళ్లు నిర్మించనున్నారు.

ఇదీ చదంవండి:సాగునీటి ప్రాజెక్టులు ఎందుకు నిలిపివేస్తున్నారు? దేవినేని ఉమా