జన్మనిచ్చిన కన్నతల్లికే పునర్జన్మనిచ్చారు ఈ కుమార్తెలు. రోడ్డు ప్రమాదంలో అచేతనంగా మారిన తల్లిని.. అహర్నిషలు శ్రమించి మామూలు స్థితికి తీసుకొచ్చారు. తల్లి లేని జీవితాన్ని ఊహించుకోలేమని చదువులు పక్కనబెట్టి ఏడాదిపాటు సపర్యలు చేశారు. తన బిడ్డలే తల్లిగా మారి చేసిన సేవలతో కోలుకున్న మాతృమూర్తి... ఇప్పుడు తన బిడ్డలను చూసి గర్విస్తోంది.
మాతృమూర్తికి మరోజన్మ
తెలంగాణలోని సంగారెడ్డి పట్టాణానికి చెందిన రహేలకు ఇద్దరు కుమార్తెలు. అనూష, వరమ్మలు పుట్టిన కొన్నాళ్లకే భర్త కుటుంబాన్ని వదిలి వెళ్లిపోయాడు. మిషన్ కుడుతూ పిల్లల్ని బాగా చదివించాలని రహేల తపనపడేది. గతేడాది అక్టోబర్‌ 21న ద్విచక్ర వాహనంపై కూతుర్ని కళాశాలలో దింపి వస్తుండగా... రోడ్డు ప్రమాదం జరిగింది. రహేల అచేతనంగా మారింది. తల్లిని మళ్లీ మామూలు మనిషిగా చూడాలని కూతుళ్లిద్దరూ ఎంతగానో ప్రయత్నించారు. డబ్బుల్లేక నానా అవస్థలు పడ్డారు. వారి ఆవేదనను ఈటీవీ - ఈటీవీ భారత్ అందరికీ తెలియజేసింది. మంత్రి హరీశ్‌రావు స్పందించి రహేలకు మెరుగైన వైద్యం అందేలా చొరవ తీసుకున్నారు. తల్లి మామూలు మనిషిగా మారితే చాలని కూతుళ్లిద్దరూ చంటిబిడ్డలా కాపాడుకున్నారు. అన్నం తినలేని స్థితిలో ముక్కు ద్వారా ద్రవ పదార్థాలు అందించారు. ఏడాది శ్రమతో అమ్మకు మరోజన్మను ప్రసాదించారు.