పోలవరం నిర్వాసితుల సమస్యల పరిష్కారంలో సానుభూతితో వ్యవహరించాలని పరిహార, పునరావాస జాతీయ పర్యవేక్షణ కమిటీ (ఎన్‌ఎంసీఆర్‌ఆర్‌) ఛైర్‌పర్సన్‌ అజయ్‌ టిర్కీ ఆంధ్రప్రదేశ్ ప్రభుత్వం, పోలవరం ప్రాజెక్టు అథారిటీ, జల్‌శక్తి అధికారులకు సూచించారు. ప్రతి ఒక్కరికీ సంపూర్ణంగా పరిహారం అందేవరకు తాము పర్యవేక్షిస్తామని కమిటీ వెల్లడించింది. దేశవ్యాప్తంగా వివిధ ప్రాజెక్టుల పరిధిలో భూ సేకరణ, పరిహారం, పునరావాసం చెల్లింపులకు సంబంధించిన అంశాలపై ఎన్‌ఎంసీఆర్‌ఆర్‌ బుధవారం సమీక్ష నిర్వహించింది.
ఈ సమీక్షకు హాజరైన పెంటపాటి పుల్లారావు మాట్లాడుతూ.. ‘నిర్వాసితులకు సరైన పరిహారం చెల్లించకుండా, పునరావాసం కల్పించకుండా బలవంతంగా వారిని ఇతర ప్రాంతాలకు తరలిస్తున్నారు. గుర్తింపు కార్డులిచ్చి..ఇళ్లు, భూములు కోల్పోయిన వివరాలను పొందుపర్చాలి. ఉద్యోగాలు ఇస్తామన్నా.. దాని ఊసే లేకుండా పోయింది’ అని వివరించారు. న్యాయవాది శ్రవణ్‌ మాట్లాడుతూ.. విలువైన భూములకు రూ.1.30 లక్షలకు మించి పరిహారం ఇవ్వడం లేదన్నారు.
ఈ అంశాలపై ఆంధ్రప్రదేశ్ ప్రభుత్వం, పోలవరం ప్రాజెక్టు అథారిటీ అధికారులు స్పందిస్తూ... ‘గిరిజనులను బలవంతంగా తరలించలేదు. వారే స్వచ్ఛందంగా తరలివెళ్లారు. అయిదు వేల మందికి ఇప్పటికే పునరావాసం కల్పించాం. మరో 15 వేల మందికి రెండు నెలల్లో ఇళ్ల నిర్మాణం పూర్తవుతుంది. కాఫర్‌ డ్యాంలో ప్రస్తుతం 25 మీటర్ల మేర నీరు ఉంది. వచ్చే ఏడాది మరింత ఎక్కువగా నిలుపుతాం. వచ్చే ఏడాదికి ముంపు ప్రాంతంలో ప్రభావం ఉంటుంది. అప్పటికి పునరావాస పనులు పూర్తి చేస్తామని..’ పేర్కొన్నారు.