'కుటుంబ పరిస్థితులే నా విజయానికి కారణం'

తండ్రి పడుతున్న కష్టాన్ని ప్రత్యక్షంగా చూసిన ఓ యువతి.. తన కుటుంబానికి అండగా నిలవాలనుకుంది. పట్టుదలతో పోటీ పరీక్షలకు సిద్ధమై...ఎస్సై కొలువు సాధించింది. ఇటీవలే శిక్షణ పూర్తి చేసుకుని బద్వేలు గ్రామీణ ఎస్సైగా నియమితులైన లలితతో ఈటీవీ భారత్ ముఖాముఖి.

కృషి, పట్టుదల ఉంటే ఏదైనా సాధ్యమే అని నిరూపించారు లలిత. పోటీ పరీక్షలలో విజయం సాధించి ఎస్సై కొలువు సాధించారు. ట్రైనింగ్ పూర్తి చేసుకుని కడప జిల్లా బద్వేలు గ్రామీణ ఎస్సైగా నియమితులయ్యారు. సాధారణ కుటుంబంలో పుట్టి.. అచంచల దీక్షతో ప్రభుత్వ కొలువు సాధించిన ఎస్సై లలిత..ఎందరో యువతులకు ఆదర్శంగా నిలుస్తున్నారు.

లలిత స్వస్థలం కర్నూలు. తల్లిదండ్రులు దాసప్ప, లక్ష్మీదేవి. వీరికి ఐదుగురు సంతానం. నలుగురు ఆడపిల్లలలో రెండో సంతానం లలిత. దాసప్ప మెకానిక్ వృత్తే ఆ కుటుంబానికి ఆధారం. చాలీచాలని సంపాదనలోనూ పిల్లలందరినీ విద్యావంతులు చేశారు. తండ్రి పడుతున్న కష్టాన్ని అర్ధం చేసుకున్న లలిత.. కుటంబానికి ఆసరా నిలవాలనుకుంది. పట్టుదలతో పోటీపరీక్షలకు సిద్ధమై...ఎస్సై కొలువు సాధించింది.

గ్రూప్స్ సాధించాలనే లక్ష్యంతో పోటీపరీక్షలకు సన్నద్ధమైన లలితను ఎస్సై జాబ్ వరించింది. జాబ్ ఏదైనా పేద ప్రజలకు సాయపడాలనేది అంతిమ లక్ష్యంతోనే ఎస్సై వృత్తిని స్వీకరించారు. చదువుల్లో ముందుండే లలితకు పలువురు చేయూతనందించారు. వారి సాయంతోనే ఓ ప్రైవేటు అకాడమీలో ఉచితంగా శిక్షణ పొందారు. ఈ శిక్షణతో పోటీ పరీక్షలలో విజయం సాధించి ఎస్సై కొలువును చేపట్టారు. పోలీసు స్టేషన్​కు వచ్చే ప్రతీ ఒక్కరికీ న్యాయం చేసేందుకు కృషి చేస్తానని లలిత తెలిపారు.

ఇవీ చూడండి :ఆదివాసీ యువత అభివృద్ధే లక్ష్యంగా... శిక్షణ