పవన్ ఎంపీగా పోటీ చేస్తే - పిఠాపురం నుంచి బరిలో నేనే: మాజీ ఎమ్మెల్యే వర్మ

TDP Leader Varma Comments on Pithapuram Constituency : సార్వత్రిక ఎన్నికల్లో టీడీపీ-జనసేన పార్టీ తరపున కాకినాడ ఎంపీగా పవన్​ కల్యాణ్​ బరిలోకి దిగితే పిఠాపురం నుంచి తాను పోటీ చేస్తానని తెలుగుదేశం మాజీ ఎమ్మెల్యే వర్మ పేర్కొన్నారు. కాకినాడ జిల్లా చేబ్రోలులోని తన గెస్ట్​ హౌస్​లో నిర్వహించిన మీడియా సమావేశంలో ఆయన ఈ సంచలన వ్యాఖ్యలు చేశారు. 20 ఏళ్లుగా నియోజకవర్గంలో టీడీపీ కోసం పని చేస్తున్నానని ఈ సందర్భంగా తెలిపారు. టీడీపీ అధినేత చంద్రబాబు ఆదేశాల మేరకు తన సీటును త్యాగం చేయవలసి వచ్చిందని వెల్లడించారు. చంద్రబాబు నాయుడు తీసుకున్న నిర్ణయానికి తను కట్టుబడి ఉన్నానని వర్మ పేర్కొన్నారు.

పొత్తు ధర్మంలో భాగంగా పిఠాపురం ఎమ్మెల్యేగా పవన్​ కల్యాణ్​ గెలుపు కోసం తాను 24 గంటలు పని చేస్తానని వర్మ వ్యాఖ్యానించారు. తన రక్తాన్ని ధారపోసి అయినా పవన్​ కల్యాణ్​ను గెలిపించి చంద్రబాబుకు గిఫ్ట్​గా ఇస్తానని ఈ సందర్భంగా పేర్కొన్నారు. పిఠాపురం నియోజక వర్గం నుంచి పవన్​ కల్యాణ్​ కాకుండా మరొకరికి తాను మద్ధతు ఇవ్వనని సృష్టం చేశారు. 

పవన్​ ఏమన్నారంటే : ఇటీవల పవన్​ కల్యాణ్​ కాకినాడ పార్లమెంట్‌ స్థానం నుంచి పోటీ చేసే అభ్యర్థిని పవన్ కల్యాణ్ ప్రకటించారు. కాకినాడ ఎంపీ అభ్యర్థిగా తంగెళ్ల ఉదయ్‌ శ్రీనివాస్‌ పోటీ చేస్తారని పవన్ తెలిపారు. ఉదయ్‌ తన కోసం ఎంతో త్యాగం చేశారని, తాను ఉదయ్​ స్థానాలు మార్చుకున్నామని అన్నారు. బీజేపీ అధిష్టానం తనను ఎంపీగా పోటీ చేయాలని ఆదేశిస్తే ఆలోచిస్తానని అన్నారు. తాను ఎంపీగా పోటీ చేస్తే, ఉదయ్​ పిఠాపురం నుంచి పోటీ చేస్తారని తెలిపారు.